Spennandi starf fyrir hjúkrunarfræðing í Laufeyjarteymi

Hjúkrunarfræðingur með brennandi áhuga á þverfaglegri vinnu með einstaklingum með samslátt geð- og vímuefnavanda óskast til starfa í hlutverk málastjóra og hjúkrunarfræðings í Laufeyjarteymi Landspítala. Starfið býður upp á mörg spennandi tækifæri til starfsþróunar.

Staðan er laus frá 15. febrúar eða eftir samkomulagi og er starfshlutfall 70-100%. Fjölskylduvænn vinnutími. Eingöngu er um dagvinnu að ræða en sé óskað eftir vöktum er það möguleiki í samstarfi við legudeild einingarinnar: Bráðalegudeild geð- og fíknisjúkdóma 32A.

Laufeyjarteymi þjónustar einstaklinga sem lifa með langvarandi samslætti geðsjúkdóma og fíknar, á því stigi að hvort um sig er alvarlegt og óstöðugt í eðli sínu og fyrri og vægari meðferðarnálganir hafa ekki skilað árangri eða bættum lífsgæðum. Teymið þjónustar einstaklinga í þeirra nærumhverfi, vettvangsþjónusta. Unnið er eftir hugmyndafræði skaðaminnkunar, batamiðaðri hugmyndafræði, áhugahvetjandi samtals og geðlæknisfræði. Meginverkefni teymisins eru að efla færni og hæfni til sjálfsumönnunar, auka virkni og tengsl við samfélagið og aðstandendur, efla áhugahvöt skjólstæðinga til breytinga og auka þekkingu skjólstæðinga á sjúkdómnum og bjargráðum.

Starfsemin er í stöðugri þróun og lögð er áhersla á virkt umbótastarf. Hjúkrunarfræðingum standa til boða mikil tækifæri til vaxtar í starfi með markvissri handleiðslu og faglegum stuðningi. Í teyminu starfa hjúkrunarfræðingar, læknar, félagsráðgjafar og málastjórar.

Hlutverk hjúkrunarfræðinga í teyminu er fjölbreytt. Hjúkrunarfræðingur ber ábyrgð á sértækum þáttum meðferðarinnar, lyfjaumsjón og mati á geðrænum einkennum, samskiptum við aðstandendur, búsetukjarna og önnur úrræði og heldur utan um þá meðferð og endurhæfingu sem einstaklingurinn þarf á að halda.

Laufeyjarteymi er þverfaglegt teymi sem er starfrækt á göngudeild geð- og fíknisjúkdóma. Tvö teymi eru á göngudeildinni, Laufeyjarteymi og göngudeildarteymi og er mikið samstarf á milli þessara teyma. Möguleiki er á því að hjúkrunarfræðingur starfi í báðum teymum ef áhugi á því er fyrir hendi.