Verkefnastjóri GMP vottunar og starfsemi á Landspítala

Í meðferðarkjarna Nýja Landspítala Háskólasjúkrahúss (NLSH) verða starfræktar Good Manufacturing Practices (GMP) vottaðar einingar á klínískri rannsókna- og stoðþjónustu. Þær einingar sem um ræðir eru lyfjablöndun og framleiðsla á stökum lyfjaeiningum í lyfjaþjónustu, frumumeðferðarkjarni í Blóðbankanum rannsóknaþjónustu og geislalyfjaframleiðsla til greiningar og meðferðar á Ísótópastofu myndgreiningarþjónustu. GMP er gæðastaðall sem nær yfir alla þætti framleiðslunnar og tryggir öryggi, hreinleika, skilvirkni og stöðugleika í lyfjaframleiðslu.

Í undirbúningi fyrir starfsemi á þeim einingum sem munu vinna eftir GMP í meðferðarkjarna leitum við að aðila með þekkingu og reynslu á þessu sviði til að stýra verkefnum tengdum undirbúningi til að tryggja að starfsemi í meðferðarkjarna sé í samræmi við GMP. Auk GMP er unnið eftir lyfjalögum og reglugerðum og lögum um geislavarnir í rými og starfsemi geislalyfjaframleiðslu.

Um er að ræða nýtt og spennandi starf sem felst í að vinna með þeim deildum sem vinna eftir GMP stöðlum, skrifa leiðbeiningar í samstarfi við viðeigandi deildir og fulltrúa þeirra, samræma vinnu á milli deilda, hafa yfirsýn yfir vinnuna og yfir þau skjöl sem unnin eru af fulltrúum viðeigandi deilda.

Verkefnið er unnið í nánu samstarfi við áðurnefndar einingar og gæðadeild Landspítala ásamt NLSH og GMP ráðgjafa þeirra. Verkefnastjórinn yrði tengiliður milli eininga með GMP vottun og tengiliður deilda í verkefnum sem snúa að NLSH.

Starfshlutfall er 100%, dagvinna og er starfið laust nú þegar eða samkvæmt samkomulagi.