Iðjuþjálfi - fjölbreytt starf á Laugarásnum, meðferðargeðdeild

Viltu öðlast víðtæka þekkingu innan fagsins!

Iðjuþjálfun vill ráða til starfa iðjuþjálfa sem hefur áhuga á fjölbreyttu og líflegu starfi. Laugarásinn er meðferðargeðdeild fyrir ungt fólk á aldrinum 18-35 ára með geðrofssjúkdóm á byrjunarstigi. Þungamiðja starfsemi Laugarássins er dagdeild þar sem rúmlega 100 einstaklingar sækja þjónustu en í húsinu að Laugarásvegi er einnig legudeild fyrir 8 þjónustuþega. Starfsemi deildarinnar einkennist af góðum starfsanda, samheldni og virkri og stöðugri framþróun.

Við leitum eftir jákvæðum og ábyrgum einstaklingi með framúrskarandi samskiptahæfni. Viðkomandi þarf að búa yfir skapandi hugsun og hafa metnað og áhuga á að starfa við endurhæfingu ungra einstaklinga. Starf iðjuþjálfa á Laugarásnum er fjölbreytt og skemmtilegt. Mikið er lagt upp úr virku umbótastarfi og lögð er áhersla á virka þátttöku iðjuþjálfa og annarra fagstétta þegar kemur að því að þróa og bæta þjónustuna.

Iðjuþjálfar á Laugarásnum starfa sem málastjórar líkt og aðrir fagaðilar. Hlutverk málastjóra er fjölbreytt og felst m.a. í mati á þörfum einstaklinga, mati á geðrænum einkennum og eftirfylgd, þróun meðferðaráætlana sem mæta þörfum hvers og eins og vöktun og mat á árangri þjónustunnar. Málastjóri ber ábyrgð á almennum þáttum meðferðarinnar, samskiptum við aðstandendur og heldur utan um þá meðferð og endurhæfingu sem einstaklingurinn þarf á að halda.

Ásamt því að starfa sem málastjórar sinna iðjuþjálfar íhlutun, sem felst m.a. í að meta færni, færniþjálfun og ráðgjöf/fræðslu. Einnig eru mörg tækifæri á hópastörfum en bæði innan Laugarássins og innan geðþjónustunnar á sér stað fjölbreytt hópastarf.

Starfshlutfall er 100% eða eftir samkomulagi og unnið er í dagvinnu. Æskilegt að umsækjendur geti hafið störf sem fyrst eða eftir nánara samkomulagi.

Vinnuvika starfsfólks í fullri vinnu er nú 36 stundir. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf.