Mannauðsstjóri

Landspítali leitar að öflugum einstaklingi með mikla reynslu af mannauðsmálum í starf mannauðsstjóra á klínísku sviði skurðlækninga, skurð- og gjörgæsluþjónustu.

Mannauðsstjóri sviðs sinnir virkri þátttöku, ráðgjöf og stuðningi við stjórnendur og starfsfólk sviðsins í öllum verkþáttum mannauðsmála, þ.e. í ráðningum, þjálfun og starfsþróun, endurgjöf, kjaramálum, samskiptum, heilsu og öryggi, í samræmi við stefnu Landspítala hverju sinni. Mannauðsstjóri sviðs tekur einnig þátt í miðlægum mannauðsverkefnum með mannauðsdeild spítalans.

Á skurð- og gjörgæsluþjónustu starfa um 1200 einstaklingar í 900 stöðugildum undir fimm kjörnum og verður hlutverk mannauðsstjórans að sinna þremur kjörnum, þ.e. sérgreinum skurðlækninga, ferliþjónustu auk dag- og legudeilda, en tveir mannauðsstjórar skipta með sér kjörnum sviðsins í heild.

Leitað er að kraftmiklum einstaklingi sem brennur fyrir málstað mannauðsmála og spítalans. Starfið er ábyrgðarmikið og krefjandi og reynir á frumkvæði, stefnumótandi hugsun og samskiptahæfileika. Mannauðsstjóri heyrir undir framkvæmdastjóra rekstrar- og mannauðssviðs og vinnur náið með öðrum mannauðsstjórum og stjórnendum skurð- og gjörgæsluþjónustu.

Í boði er frábær vinnuaðstaða, fyrsta flokks mötuneyti og stytting vinnuvikunnar. Starfshlutfall er 100% og æskilegt að viðkomandi geti hafið störf sem fyrst.