Tengiliður farsældar barna – Víðistaðaskóli

Víðistaðaskóli óskar eftir að ráða tengilið farsældar barna fyrir skólaárið 2025-2026.

Í Víðistaðaskóla eru um 500 nemendur í 1. – 10. bekk. Leiðarljós skólans eru ábyrgð, virðing, vinátta og grundvallast starf skólans af þeim gildum.

Í Víðistaðaskóla fögnum við fjölbreytileikanum og er áhersla lögð á að hver nemandi fái kennslu við hæfi til að þroska hæfileika sína. Lögð er áhersla á líðan nemenda, fjölbreytta kennsluhætti og góðan námsárangur. Í skólanum er skapandi og gefandi námsumhverfi þar sem allir aðilar leitast við að gera námið áhugavert og skemmtilegt. Unnið er að þróun teymiskennslu og notkun spjalda í skólastarfi. Í skólanum er metnaðarfullt starf sem byggir á skólaþróun og nemendalýðræði. Víðistaðaskóli er heilsueflandi grunnskóli og starfar í anda grænfánans þar sem lögð er áhersla á umhverfismennt og útikennslu. Í skólanum er unnið eftir SMT skólafærni þar sem lögð er áhersla á að styrkja og efla jákvæð samskipti milli nemenda sem annarra í skólasamfélaginu. Í Víðistaðaskóla er góður starfsandi og samheldni meðal þeirra sem í skólanum starfa.

Ráðið verður í starfið frá og með 1. september og er starfið tímabundið í eitt ár. Starfshlutfall ráðningar er 49% en möguleiki er á aukningu í starfshlutfalli í öðrum störfum innan skólans s.s. kennslu.

Markmið með starfi tengiliðar farsældar barna í leik- og grunnskólum er að stuðla að því að nemendur og foreldrar sem á þurfa að halda hafi greiðan aðgang að samþættri þjónustu við hæfi.

Helstu verkefni og ábyrgð:

• Veita foreldrum og nemendum sem á þurfa að halda upplýsingar um samþætta farsældarþjónustu
• Skipuleggja, samhæfa og fylgja eftir þjónustu á fyrsta stigi samþættingar í kjölfar frummats
• Meta og/eða eiga samráð um mat á þörf fyrir annars eða þriðja stigs þjónustu og þar með skipan málstjóra
• Stuðla að þátttöku foreldra og nemenda í ákvarðanatöku og úrræðum
• Samvinna og fræðsla til stjórnenda, kennara og annars starfsfólks skóla
• Önnur verkefni samkvæmt starfslýsingu

Menntunar- og hæfniskröfur:

• Leyfisbréf kennara/löggild starfsréttindi heilbrigðisstéttar eða sambærileg menntun sem tengist starfi með börnum og fjölskyldum
• Nám á framhaldsstigi í farsæld barna er kostur
• Haldgóð reynsla af starfi með börnum og eftir atvikum fjölskyldum
• Þekking á verkefnastjórnun er kostur
• Þekking á snemmtækum og hagnýtum verkfærum til stuðnings nemendum
• Leikni í ráðgjöf í þverfaglegu samstarfi
• Samskiptahæfni og jákvætt viðmót
• Góð íslensku- og enskukunnátta og hæfni til að tjá sig í ræðu og riti

Gerð er krafa um hreint sakavottorð við ráðningu.

Nánari upplýsingar um starfið veita Dagný Kristinsdóttir, skólastjóri, og Valgerður Júlíusdóttir aðstoðarskólastjóri í tölvupósti á [email protected] eða í síma 595-5800.

Umsóknarfrestur er til og með 6.október 2025.

Greinargóð ferilskrá fylgi umsókn.

Launakjör eru samkvæmt kjarasamningi Sambands íslenskra sveitarfélaga við viðkomandi stéttarfélag.

Vakin er athygli á stefnu Hafnarfjarðarbæjar að jafna hlutfall kynjanna í störfum hjá bænum og að vinnustaðir bæjarins endurspegli fjölbreytileika samfélagsins.