Hjúkrunarfræðingur á almennri göngudeild 10E

Laust er til umsóknar starf hjúkrunarfræðings annars vegar í meltingarteymi og hins vegar í kviðarholsteymi Landspítala sem staðsett er á almennri göngudeild 10E við Hringbraut.

Göngudeild 10E heyrir undir skurðlækninga-, skurðstofu- og gjörgæsluþjónustu og er opin á dagvinnutíma alla virka daga. Á deildinni eru unnið í sérhæfðum teymismóttökum hjúkrunarfræðinga og er þeim skipt í ígræðslu-, kviðarhols- og meltingarteymi. Meltingarteymið sinnir sérhæfðu eftirliti sjúklinga með langvinna meltingarsjúkdóma t.d þarmabólgusjúkdóma (IBD), næringarslöngur/hnappa, krabbamein, skorpulifur. Þá er hluti starfseminnar á innrennslismóttöku, þar sem gefin eru líftæknilyf, blóðgjafir og sýklalyf, auk þess sem framkvæmdar eru rannsóknir á deildinni. Kviðarholsteymið sinnir sjúklingum fyrir og eftir aðgerðir á kviðarholi og eru markmið teymisins að mæta skjólstæðingum sínum á einstaklingsbundinn hátt strax í greiningarferlinu og út í gegnum allt meðferðarferlið. Kviðarholsteymið sinnir einnig sérhæfðum móttökum m.a. sjúklinga með sár, sárasugur, grindarbotnsvandamál og stóma.

Unnið er markvisst að umbótum og framþróun á deildinni, en þar starfar öflugur hópur reyndra hjúkrunarfræðinga og einkennist vinnuandinn af samvinnu, metnaði og góðum liðsanda. Starfið er því afar fjölbreytt og krefjandi og gefur mikla möguleika til starfsþróunar. Hér er tækifæri fyrir framsækinn og metnaðarfullan hjúkrunarfræðing sem hefur áhuga á að vinna í teymi en einnig sjálfstætt og af frumkvæði. Í boði er einstaklingsmiðuð aðlögun undir leiðsögn reyndra hjúkrunarfræðinga.

Starfshlutfall er 70-100% dagvinna og er starfið laust nú þegar eða eftir nánara samkomulagi.

Vinnuvika starfsfólks í fullri dagvinnu er 36 stundir. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf.