Starf í móttöku á velferðarsviði Kópavogsbæjar

Velferðarsvið óskar eftir öflugum einstaklingi til að starfa í lifandi móttöku sviðsins.

Um fullt starf er að ræða frá klukkan 8 til 16 mánudaga til fimmtudaga og frá klukkan 8 til 13 á föstudögum. Æskilegt er að viðkomandi geti hafið störf sem fyrst.

Þjónustufulltrúi heyrir undir skrifstofu rekstrar, þar sem hann sinnir ritara- og móttökustörfum fyrir allar skrifstofur sviðsins eftir því sem við á. Helstu verkefni felast í símavörslu, upplýsingagjöf í móttöku, skráningu gagna, skjalavörslu, frágangi fundargerða og útsendingu bréfa.

Þjónustufulltrúi sér um að þjónusta sviðsins sé aðgengileg og fagleg með því að aðstoða og leiðbeina notendum.

Starfsfólk velferðarsviðs leitast við að skapa trausta ímynd og sýna hlutlægni, umhyggju og virðingu í verki gagnvart íbúum Kópavogsbæjar og öðru starfsfólki. Áhersla er lögð á árangursríka, skilvirka og hagkvæma þjónustu og gott samstarf við önnur svið bæjarins.

Velferðarsvið skiptist samkvæmt nýju skipulagi í fimm fagskrifstofur; skrifstofu barnaverndarþjónustu, skrifstofu félagslegs húsnæðis, skrifstofu ráðgjafar, skrifstofu starfsstöðva og þróunar og skrifstofu þjónustu og sértækrar ráðgjafar. Stoðskrifstofur eru tvær; skrifstofa sviðsstjóra og skrifstofa rekstrar.