Heilbrigðisstofnun Vesturlands

Heilbrigðisstofnun Vesturlands (HVE) veitir íbúum umdæmisins og öðrum, almenna og sérhæfða heilbrigðisþjónustu í samræmi við lög og reglur á hverjum tíma. Lögð er áhersla á virðingu, traust og fagmennsku. Velferð skjólstæðinga skal höfð að leiðarljósi. Stuðlað er að virkri sí- og endurmenntun starfsfólks. HVE tekur þátt í menntun heilbrigðisstétta í samvinnu við Háskóla Íslands, Háskólann á Akureyri og aðrar menntastofnanir. Kjarnastarfsemin skiptist á þrjú málefnasvið eftir meginviðfangsefnum. Heilsugæslusvið Læknisþjónusta, hjúkrun, geðheilbrigðisþjónusta, heilsuvernd, forvarnir, slysa- og bráðaþjónusta og annast sjúkraflutninga. Hjúkrunarsvið starfrækir hjúkrunarrými á starfsvæðinu þar sem slík þjónusta er ekki rekin af öðrum. Sjúkrasvið starfrækir umdæmissjúkrahús, almenn sjúkrarými og endurhæfingu. Heilbrigðisumdæmi Vesturlands nær yfir Akraneskaupstað, Hvalfjarðarsveit, Skorradalshrepp, Borgarbyggð, Eyja- og Miklaholtshrepp, Snæfellsbæ, Grundarfjarðarbæ, Helgafellssveit, Stykkishólmsbæ, Dalabyggð, Reykhólahrepp, Strandabyggð, Kaldrananeshrepp, Árneshrepp og Húnaþing vestra.

Vinnustaðurinn

Sérnámsstaða í Heimilislækningum

Laus er til umsóknar sérnámsstaða í heimilislækningum hjá Heilbrigðisstofnun Vesturlands, Akranesi. Námsstaðan veitist frá 1.janúar 2025 og veitist til 5 ára. Námið fer fram á heilsugæslunni Akranesi og á sjúkrahúsi skv. nánara samkomulagi við handleiðara og kennslustjóra sérnáms.

Heilsugæslunni á Akranesi tilheyra tæplega 9000 íbúar, góð samvinna er við sjúkrahús HVE á Akranesi þar sem m.a. er slysa- og göngudeild.

Helstu verkefni og ábyrgð

Á Heilsugæslustöðinni á Akranesi fer fram fjölbreytt starfsemi en auk almennrar heilsugæsluþjónustu eins og móttöku, ungbarnaverndar, skólaheilsugæslu og mæðraverndar er þar teymisvinna í kring um vaktþjónustu að deginum og sykursýkismóttöku.

Sérnámslæknir tekur þátt í almennri móttöku og vaktþjónustu eftir nánara samkomulagi.

Vikulegir fræðslufundir og þátttaka í gæðaþróun og kennslu.

Sérnámið byggir á marklýsingu Félags íslenskra heimilislækna, https://throunarmidstod.is/kennsla/sernam-i-heimilislaekningum/

Menntunar- og hæfniskröfur

Íslenskt lækningaleyfi.
Lögð er áhersla á faglegan metnað, jákvæðni og sveigjanleika.
Lipurð og áreiðanleiki í samskiptum eru skilyrði.
Góðrar íslensku kunnáttu er krafist.

Áskilinn er réttur til að hafna umsóknum frá einstaklingum sem ekki teljast uppfylla framangreind skilyrði.

Laun samkvæmt gildandi kjarasamningi sem fjármála- og efnahagsráðherra og Læknafélag Íslands hafa gert.

Umsókn skal fylgja ítarleg náms- og starfsferilsskrá. Jafnframt skal leggja fram staðfestar upplýsingar um læknismenntun, læknisstörf og vísinda- og rannsóknarstörf ásamt staðfestu afriti af opinberu starfsleyfi.

Mat á hæfni umsækjenda byggist á innsendum gögnum og viðtölum við umsækjendur. Gögn sem ekki er hægt að senda rafrænt skulu berast til yfirlæknis heilsugæslustöðvarinnar á Akranesi.

Öllum umsóknum verður svarað þegar ákvörðun um ráðningu hefur verið tekin. Akranes er góður staður til að búa á, stutt í mikla náttúrufegurð, mannlíf gott og starfsandi á stöðinni góður.

Starfshlutfall er 100%

Umsóknarfrestur er til og með 28.11.2024