Lögfræðingur á mannauðssvið Fjársýslunnar

Viltu taka þátt í að bæta umgjörð mannauðsmála ríkisins og hjálpa ríkisaðilum að bæta stjórnun mannauðsmála og taka réttar ákvarðanir?

Óskum eftir lausnamiðuðum og metnaðarfullum lögfræðingi í öflugt teymi sérfræðinga þar sem áhersla er lögð á fagleg vinnubrögð og vandaða þjónustu.

Dagleg verkefni eru fjölbreytt og krefjandi og spanna öll svið vinnumarkaðs- og mannauðsmála, svo sem lögfræðilegar umsagnir, ráðgjöf um framkvæmd kjarasamninga og starfsmannamál, miðlun upplýsinga, fræðsla og virk þátttaka í þróun og innleiðingu nýrra starfsaðferða. Lögfræðingurinn sem við leitum eftir þarf að hafa áhuga á vinnumarkaðsmálum og starfsumhverfi hins opinbera.

Mannauðssvið sinnir ráðgjöf við ríkisaðila á sviði kjara- og mannauðsmála. Undir þetta fellur m.a. túlkun kjarasamninga, laga og reglna ásamt ráðgjöf um ýmis mál sem snúa að stjórnun mannauðsmála og stuðningi við ríkisaðila á þessu sviði. Á mannauðssviði fer einnig fram launaafgreiðsla fyrir tæplega 200 ríkisaðila og um 21 þúsund starfsmenn ásamt þátttöku í þróun fjárhags- og mannauðskerfa ríkisins.

Fjársýslan er þjónustu- og þekkingarstofnun á sviði opinberra fjármála. Stofnunin veitir ríkisaðilum fjölbreytta þjónustu og ráðgjöf á sviði opinberra fjármála, mannauðsmála og innkaupa. Fjársýslan leggur áherslu á að skapa virði fyrir viðskiptavini og greiða leið fyrir bætta þjónustu ríkisins.

Upplýsingar um starfsemi Fjársýslunnar má finna á https://island.is/s/fjarsyslan.