Hjúkrunarfræðingur - Spennandi starf í geðrofs- og samfélagsteymi Landspítala
Metnaðarfullur hjúkrunarfræðingur óskast til starfa í geðrofs- og samfélagsgeðteymi á meðferðareiningu geðrofssjúkdóma á Landspítala. Starfsumhverfið er spennandi, krefjandi og skemmtilegt, vinnutíminn fjölskylduvænn og fjölmörg tækifæri eru til faglegrar þróunar. Starfshlutfall er 70-100% og er um dagvinnu að ræða. Með styttingu vinnuvikunnar er miðað við 36 klukkustunda vinnuviku í 100% starfi. Sé óskað eftir vöktum er það einnig möguleiki í samstarfi við aðrar deildir geðsviðs. Staðan er laus frá 1. júní 2024 eða eftir samkomulagi.
Teymin, sem eru tvö talsins, eru í stöðugri þróun og uppbyggingu. Hjúkrunarfræðingar gegna þar lykilhlutverki í mótun framtíðarsýnar, eflingu hjúkrunar, meðferðar og endurhæfingu fyrir einstaklinga með alvarlega geðrofssjúkdóma.
Meginverkefni teymanna er að veita fólki sem greinst hefur með alvarlega geðsjúkdóma og aðstandendum þeirra þverfaglega og einstaklingsmiðaða þjónustu. Þjónustan byggir á batamiðaðri hugmyndafræði og skaðaminnkandi nálgun. Markmið meðferðarinnar er að stuðla að bata, rjúfa félagslega einangrun og auka virkni og lífsgæði í daglegu lífi. Starfsemin er í stöðugri þróun og lögð er áhersla á virkt umbótastarf. Málastjórum standa til boða mikil tækifæri til vaxtar í starfi með markvissri handleiðslu og faglegum stuðningi. Meðal annars er lögð áhersla á að allir málastjórar sæki námskeið í áhugahvetjandi samtalstækni. Í teymunum starfa hjúkrunarfræðingar, félagsráðgjafar, sálfræðingar, læknar, ráðgjafar og jafningi. Náið samstarf og samvinna er við velferðarþjónustu sveitafélaga, heilsugæslu og geðheilsuteymi heilsugæslunnar.
Margir möguleikar eru á starfsþróun fyrir hjúkrunarfræðinga. Geðsvið býður sérhæft starfsþróunarár fyrir nýja hjúkrunarfræðinga á geðsviði sem felur í sér handleiðslu reynslumikilla geðhjúkrunarfræðinga, ásamt fræðslu. Spennandi meistaranám í klínískri geðhjúkrun við Háskóla Íslands og Háskólann á Akureyri í samstarfi við geðsvið Landspítala hófst haustið 2022.
