Lyfjafræðingur í lyfjaþjónustu

Lyfjaþjónusta Landspítala óskar eftir lyfjafræðingi til starfa í blöndunareiningu. Um er að ræða fjölbreytt starf sem sameinar verkefni á sviði lyfjablöndunar og ráðgjafar um næringu í æð. Starfið felur meðal annars í sér verkefni tengd næringarmeðferð í æð, þar á meðal ráðgjöf og eftirfylgni, samhliða verkefnum á sviði lyfjablöndunar, gæðastarfs og þróunar starfseminnar. Í lyfjablöndun starfar samhentur 20 manna hópur lyfjafræðinga, lyfjatækna og sérhæfðs starfsfólks. Þar fer fram sérhæfð lyfjablöndun í hreinum rýmum, einkum blöndun krabbameinslyfja, sýklalyfja og næringar í æð.

Lyfjaþjónusta gegnir mikilvægu hlutverki í öruggri og markvissri lyfjameðferð sjúklinga á Landspítala. Innan þjónustunnar starfa um 90 manns við fjölbreytt verkefni sem tengjast meðal annars öflun, blöndun og dreifingu lyfja, auk faglegrar ráðgjafar og upplýsingagjafar um lyf. Lyfjaþjónusta er stöðugt að þróa starfsemi sína til að bæta lyfjaöryggi og lyfjaumsýslu á Landspítala. Nú starfa um 40 lyfjafræðingar í fjölbreyttum verkefnum á Landspítala og mikil framþróun er framundan með tilkomu nýs meðferðarkjarna.

Um er að ræða dagvinnu og æskilegt er að viðkomandi geti hafið störf sem fyrst.

Vinnuvika starfsfólks í fullri dagvinnu er 36 stundir sem stuðlar að betra jafnvægi milli vinnu og einkalífs.