Greinandi í UFS mötum og sjálfbærni

Reitun er alhliða greininga- og matsfyrirtæki á innlendum fjármálamarkaði. Sjálfbærnigreiningar og UFS möt eru eitt af verkefnum Reitunar og leitum við nú að öflugum greinanda með brennandi áhuga á sjálfbærni til að bætast í hópinn.

UFS möt (e. ESG Rating) eru möt á sjálfbærniframmistöðu fyrirtækja, fjármálafyrirtækja og annarra rekstraraðila. UFS stendur fyrir umhverfis- og félagsþætti og stjórnarhætti. Vaxandi kröfur almennings, fjárfesta og löggjafans eru gerðar til fyrirtækja í sjálfbærnimálum auk þess sem farið er að taka tillit til þeirra í verðmötum fyrirtækja og lánshæfismötum. UFS möt meta sjálfbærniþætti með hlutlægum hætti og gefur þeim einkunn þannig að hægt er að sjá hratt og vel hvernig fyrirtæki standa í samanburði við aðra. Reitun hefur undanfarin tvö ár metið alla skráða útgefendur hlutabréfa og skuldabréfa í Kauphöllinni.

Hjá Reitun byggjum við á öflugri aðferðafræði, miklum gagnagæðum, sérhæfðu stafrænu matskerfi og góðri þekkingu. Þjónustusamningar eru við erlendar gagnalindir, upplýsingaveitur og önnur matsfyrirtæki. Viðskiptavinir eru fjárfestar, fjármálafyrirtæki og fyrirtæki.

Nýr starfsmaður fær góða þjálfun í byrjun til að vera vel undirbúinn að takast á við komandi verkefni.

Farið er með allar umsóknir sem trúnaðarmál. Allar umsóknir vel þegnar og svarað að ráðningu lokinni.