Félagsráðgjafi á móttökugeðdeild 33C á Landspítala

Leitað er að áhugasömum og metnaðarfullum félagsráðgjafa til starfa á móttökugeðdeild 33C á Landspítala. Viðkomandi þarf að búa yfir færni til að vinna að lausnum og hafa metnað til að veita framúrskarandi þjónustu. Lögð er áhersla á þverfaglega teymisvinnu, fjölskyldumiðaða nálgun og gagnreynd vinnubrögð. Meginhlutverkið er að veita sjúklingum og aðstandendum þeirra stuðning til þess að takast á við breytingar sem verða í kjölfar veikinda og afleiðingar þess, kortleggja þjónustuþörf sjúklinga og veita þeim og fjölskyldum þeirra upplýsingar um félagsleg réttindi, aðstoða við útskriftir og tengingar við önnur þjónustukerfi. Margvíslegir möguleikar ery á starfsþróun

Áhersla er á stuðning við fjölskyldur og stuðning við börn sem aðstandendur á grundvelli laga um samþætta þjónustu í þágu farsældar barna. Á móttökugeðdeild er m.a. veitt sérhæfð þjónusta fyrir foreldra sem glíma við geðsjúkdóma á meðgöngu og eftir fæðingu. Landspítali styður nýútskrifaða félagsráðgjafa í starfi með markvissri handleiðslu og fræðslu, samhliða starfi í formi starfsþróunarárs Landspítala.

Á Landspítala starfa um 50 félagsráðgjafar sem sinna margþættri þjónustu við sjúklinga á öllum sviðum spítalans. Félagsráðgjafar starfa í nánu samstarfi við annað starfsfólk spítalans og lögð er áhersla á þverfaglega teymisvinnu. Landspítali er fjölskylduvænn vinnustaður og býður upp á heilsueflandi vinnuumhverfi, samgöngusamninga og styttingu vinnuvikunnar.