Vörueigandi Áhættustýringarlausna

Íslandsbanki leitar að kraftmiklum og metnaðarfullum einstaklingi til að leiða framþróun hugbúnaðarlausna Áhættustýringar bankans. Starfið heyrir beint undir framkvæmdastjóra Áhættustýringar og vörueigandi er hluti af stjórnendateymi Áhættustýringar.

Vörueigandi hefur forgöngu um að skilgreina, skipuleggja og forgangsraða hugbúnaðargerð á sviði Áhættustýringar í samstarfi við sérfræðinga í vöruteymi áhættustýringar og fjármála. Starfið felur í sér samstarf við stóran hóp starfsfólks, bæði innan Áhættustýringar sem og á öðrum sviðum bankans, ásamt því að fela í sér samskipti og samvinnu við eftirlitsaðila.

Hlutverk Áhættustýringar Íslandsbanka er að sjá til þess að fram fari mæling, mat og skýrslugjöf um áhættu í starfsemi bankans þannig að stjórn, stjórnendur og eftirlitsaðilar hafi á hverjum tíma fullnægjandi yfirsýn yfir starfsemina. Áhættustýring hefur eftirlit með framkvæmd áhættustýringar, veitir ráðgjöf til að stuðla að góðri áhættumenningu og tekur virkan þátt í mótun áhættustefnu bankans. Þannig styður sviðið við vegferð bankans að vera hreyfiafl til góðra verka.