Teymisstjóri vélaverkstæðis
Rekstrar- og mannauðssvið Landspítala auglýsir eftir teymisstjóra vélaverkstæðis. Við leitum að öflugum teymisstjóra sem hefur brennandi áhuga á að styðja mikilvæga starfsemi innan tækniþjónustu á Landspítala, einum stærsta vinnustað landsins.
Einingar sem tilheyra tækniþjónustu eru vélaverkstæði, rafmagnsverkstæði og pípulagningaverkstæði sem saman gegna gríðarlega mikilvægu hlutverki innan sjúkrahússins. Vélaverkstæði ber ábyrgð á rekstri margra ólíkra tæknikerfa, t.d. gufuframleiðslu, loftræsikerfa og viðhaldi á ýmsum búnaði. Verkefni teymisstjóra eru því fjölbreytt og gefandi og markast af þeirri þjónustu sem Landspítali veitir.
Við sækjumst eftir einstaklingi með brennandi áhuga á teymisvinnu og að byggja upp og viðhalda sterkri liðsheild. Leitað er að jákvæðum og ábyrgum einstaklingi sem býr yfir skipulagshæfni, lipurð í mannlegum samskiptum og heiðarleika. Teymisstjóri vinnur náið með stjórnendum, starfsfólki og hagaðilum innan sem utan spítalans að framþróun, þjónustu og umbótum. Starfshlutfall er 100% og er starfið laust samkvæmt samkomulagi.
