Reykjavíkurborg - Velferðarsvið

Velferðasvið ber ábyrgð á áætlanagerð, samhæfingu og samþættingu verkefna á sviði velferðarþjónustu, eftirliti í samræmi við lög, reglur, samþykktir og pólitíska stefnu í velferðarmálum, mat á árangri og þróun velferðarþjónustu og nýrra úrræða og gerð þjónustusamninga um framkvæmd þjónustunnar. Velferðarsvið býr Reykjavíkurborg ennfremur undir að taka við nýjum velferðarverkefnum frá ríki svo sem í málefnum fatlaðra, öldrunarþjónustu og heilsugæslu. Velferðarsvið ber ábyrgð á framkvæmd þjónustu á sviði velferðarmála, þar með talinni félagsþjónustu fyrir alla aldurshópa og barnavernd. Velferðarsvið ber ábyrgð á rekstri þjónustumiðstöðva Reykjavíkurborgar og starfseininga sem undir þær heyra. Velferðarsvið vinnur með velferðarráði og barnaverndarnefnd og sinnir málefnum þeirra. Þjónustumiðstöðvar vinna með hverfaráðum í hverfum borgarinnar. Velferðarsvið sér einnig um rekstur miðlægrar velferðarþjónustu þvert á borgina, átaksverkefna vegna endurhæfingar fólks, heildstæðu forvarnastarfi í Reykjavík, inntöku í húsnæðis- og búsetuúrræði, rekstur hjúkrunarheimila, rekstur framleiðslueldhúss og rekstur heimahjúkrunar í Reykjavík samkvæmt samningi við ríkið þar um.

Vinnustaðurinn

Starfskraftur óskast í VoR teymi Reykjavíkurborgar

Hefurðu áhuga á málaflokki heimilislausra með flóknar þjónustuþarfir? Vettvangs- og ráðgjafateymi borgarinnar auglýsir eftir öflugum starfskrafti í teymið til að starfa á vettvangi við ráðgjöf og stuðning.

Vesturmiðstöð leitar að starfsmanni í Vettvangs- og ráðgjafateymi (VoR-teymið innan málaflokks heimilislausra með miklar og flóknar þjónustuþarfir). Um er að ræða starf í 100% starfshlutfalli í dagvinnu. Um ráðningu til sex mánaða er að ræða, með mögulega á áframhaldandi ráðningu, æskilegast að viðkomandi geti hafið störf sem fyrst.

Vettvangs- og ráðgjafateymi Reykjavíkurborgar (VoR) aðstoðar heimilislaust fólk með miklar og flóknar þjónustuþarfir. VoR veitir einstaklingsmiðaða ráðgjöf og stuðning á vettvangi.

VoR teymið veitir ákveðnum hópi fólks í sjálfstæðri búsetu stuðning og ráðgjöf í anda hugmyndafræðinnar um Húsnæði fyrst. Í þjónustunni er tekið mið af skaðaminnkandi nálgun til að draga úr skaðlegum áhrifum jaðarsetningar og draga úr skaðsemi og áhættu sem geta fylgt vímuefnanotkun. Einnig er unnið eftir batahugmyndafræði, áfallamiðaðri nálgun og notaðar aðferðir áhugahvetjandi samtals (Motivational Interviewing).

Helstu verkefni og ábyrgð

Veita jaðarsettum hópi fólks stuðning í sjálfstæðri búsetu og ráðgjöf undir formerkjum Húsnæði fyrst hugmyndafræðinnar.
Virkt notendasamráð – notandi sérfræðingurinn.
Veita íbúum/notendum heildstæða þjónustu í nærumhverfi sínu samkvæmt einstaklingsáætlun.
Stuðningur til sjálfshjálpar og samfélagslegrar þátttöku og virkni.
Stuðningur við samskipti við stofnanir.
Þátttaka í sköpun og þróun nýrra tækifæri fyrir íbúa.

Menntunar- og hæfniskröfur

Góð almenn menntun.
Reynsla af starfi með jaðarsettum einstaklingum með fjölþættan vanda.
Framúrskarandi hæfni í mannlegum samskiptum.
Þekking eða áhugi á skaðaminnkandi nálgun, áfallamiðaðri nálgun og batahugmyndafræði.
Sjálfstæði í vinnubrögðum, skipulagshæfni og frumkvæði.
Sveigjanleiki, þolinmæði og umburðarlyndi.
Íslenskukunnátta B2 (í samræmi við samevrópskan tungumálaramma).
Hreint sakavottorð í samræmi við lög sem og reglur Reykjavíkurborgar.