Hjúkrunarfræðingar Barna- og unglingageðdeild Landspítala
Metnaðarfullir hjúkrunarfræðingar óskast til starfa á BUGL. Störfin eru laus nú þegar eða eftir nánara samkomulagi. Bæði er um starf á legudeild og göngudeild að ræða og verkefni taka mið af áhugasviði, færni og fyrri reynslu. Þannig geta störfin hentað bæði nýju og reynslumiklu fagfólki.
Á göngudeild er unnið í dagvinnu en á legudeild er vinnufyrirkomulag vaktavinna, vaktabyrði er hófleg en einnig er möguleiki á að vinna eingöngu dagvinnu.
BUGL samanstendur af tveimur deildum á Landspítala, legudeild og göngudeild. Þar er veitt sérhæfð og fjölskyldumiðuð heilbrigðisþjónusta við börn sem þarfnast sjúkrahúsþjónustu vegna geðræns vanda. Unnið er í þverfaglegum teymum og mikil samvinna höfð við fagaðila í nærumhverfi.
Á BUGL starfa um 100 einstaklingar í fjölskylduvænu starfsumhverfi. Starfsaðlögun er markviss og einstaklingshæfð og miklir möguleikar eru til starfsþróunar og sérhæfingar. Þjónustan er í stöðugri framþróun og kapp er lagt á notendamiðaða þjónustu og styttingu biðtíma.