Hegðunarráðgjafi í grunnskólum

Spennandi starf í skóla- og frístundaþjónustu

Vesturmiðstöð auglýsir starf hegðunarráðgjafa í grunnskólum laust til umsóknar. Hegðunarráðgjafi vinnur með og veitir ráðgjöf til kennara og annars starfsfólks grunnskóla vegna hegðunarvanda einstakra nemenda eða nemendahópa. Meginhlutverk hegðunarráðgjafa er að greina hvernig óæskileg hegðun birtist og veita leiðsögn um viðeigandi úrræði út frá þeim upplýsingum. Hegðunarráðgjafi sinnir einnig fræðslu til skóla um viðurkenndar leiðir í hegðunarmótun og tekur þátt í lausnarteymum grunnskólanna í borgarhlutunum.

Vesturmiðstöð er framsækinn vinnustaður sem býður upp á spennandi tækifæri til að taka þátt í þverfaglegu samstarfi og uppbyggingu á þjónustu við íbúa í borgarhlutanum. Í boði er vinna með metnaðarfullum hópi sérfræðinga skóla- og frístundaþjónustu og velferðarsviðs ásamt starfsfólki grunnskóla í Vesturbæ, miðborg og Hlíðum. Á miðstöðinni starfa meðal annars talmeinafræðingar, sálfræðingar, félagsráðgjafar og kennslu- og hegðunarráðgjafar og ráðgjafaþroskaþjálfi, að málefnum barna, skóla og fjölskyldna í borgarhlutanum.