Heilbrigðisvísindasvið Háskóla Íslands

Verkefnisstjóri við færni og hermisetur í Hjúkrunar- og ljós

Laust er til umsóknar fullt starf verkefnisstjóra við færni- og hermisetur Hjúkrunar- og ljósmóðurfræðideildar og Heilbrigðisvísindasviðs - HermÍs. Um framtíðarstarf er að ræða.

Um er að ræða fjölbreytt, skemmtilegt og lifandi starf í síbreytilegu og kviku umhverfi þar sem þróun nýrra kennsluhátta og nýsköpun er í fyrirrúmi. Færni- og hermikennsla byggir m.a. á notkun svokallaðra sýndarsjúklinga, hlutherma og sýndarveruleika sem verkefnisstjóri þarf að vera reiðubúinn að kynna sér og fylgja eftir þróun í þeim efnum.

Starf verkefnisstjóra felst fyrst og fremst í daglegri umsýslu færni- og hermiseturs Hjúkrunar- og ljósmóðurfræðideildar, auk HermÍs. Þá felast einnig í starfinu verkefni á deildaskrifstofu sem einkum lúta að skipulagi náms, stundaskrárgerð og undirbúningi fyrir viðburði.

Verkefnisstjórinn heyrir undir deildarforseta Hjúkrunar- og ljósmóðurfræðideildar og hefur aðsetur í Eirbergi, við Eiríksgötu 34, ásamt öðru starfsfólki í stoðþjónustu deildar, sem og samstarfsfólki í HermÍs.

Í stefnu Háskóla Íslands - HÍ26 - er sérstök áhersla lögð á skólinn sé góður vinnustaður, að starfsumhverfi sé hvetjandi með vellíðan nemenda og starfsfólks að leiðarljósi. Lögð er áhersla á að laða að metnaðarfullt fólk með fjölbreyttan bakgrunn. 36 stunda vinnuvika hefur verið innleidd fyrir starfsfólk stjórnsýslu skólans.

Helstu verkefni og ábyrgð

Dagleg umsýsla, bókanir, skipulag og viðhald tækja og búnaðar
Undirbúningur fyrir nám og kennslu í samráði við hlutaðeigandi kennara, sem og frágangur að lokinni kennslu
Innkaup og birgðahald búnaðar sem nýttur er til kennslunnar
Þjónusta, stuðningur og upplýsingaveita fyrir þau sem koma að kennslu í setrinu
Undirbúningur og þátttaka í viðburðum sem tengjast setrinu
Þátttaka í stundaskrárgerð
Þátttaka í þróunarverkefnum er lúta að færni- og herminámi

Menntunar- og hæfniskröfur

Háskólapróf sem nýtist í starfi, æskilegt er að það sé á sviði heilbrigðisvísinda
Gott vald á upplýsingatækni og hæfni til að tileinka sér nýjungar á því sviði
Klínískt nám og starfsreynsla á klínískum vettvangi er kostur
Góð samstarfshæfni, sveigjanleiki og rík þjónustulund
Sjálfstæð, skipulögð og lausnamiðuð vinnubrögð
Góð íslensku- og enskukunnátta

Laun samkvæmt gildandi kjarasamningi sem fjármála- og efnahagsráðherra og viðkomandi stéttarfélag hafa gert.

Viðkomandi þarf að geta hafið störf sem fyrst, eða skv. nánara samkomulagi.

Eftirfarandi gögn skulu fylgja umsókninni:

Ferilskrá
Staðfest afrit af prófskírteinum
Upplýsingar um nafn, símanúmer og starf a.m.k. tveggja umsagnaraðila
Greinargerð þar sem áhuga fyrir verkefninu er lýst og fjallað um hvað umsækjandi getur lagt af mörkum til þess

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests.

Við ráðningu í störf í Háskóla Íslands er tekið mið af jafnréttisáætlun skólans.

Vakin er athygli á málstefnu Háskóla Íslands.

Færnisetur Hjúkrunarfræðideildar er um 500 m2 að stærð og útbúið fullkomnum tækjabúnaði, meðal annars tölvustýrðum sýndarsjúklingum, fjölda hlutherma auk margvíslegra möguleika til gagnvirkrar kennslu með nýjustu tækni. Markmiðið með starfsemi Færnisetursins er að nemendur í heilbrigðisvísindum fái kennslu og þjálfun í flestu því sem snýr að meðferð sjúklinga. Í Færnisetrinu er kennt í öruggum aðstæðum og hægt að endurtaka viðfangsefni eins oft og þörf krefur. Þar er líkt eftir raunverulegum aðstæðum og nemendur undirbúnir eins vel og kostur er fyrir störf á heilbrigðisstofnunum. Til að mynda er hægt að kenna og þjálfa viðbrögð við sjaldgæfum aðstæðum og bráðatilfellum og þannig efla öryggi sjúklinga.

Heilbrigðisvísindasvið er eitt af fimm fræðasviðum Háskóla Íslands. Innan sviðsins eru sex deildir; Hjúkrunar- og ljósmóðurfræðideild, Lyfjafræðideild, Læknadeild, Matvæla- og næringarfræðideild, Sálfræðideild og Tannlæknadeild. Heilbrigðisvísindasvið gegnir lykilhlutverki í íslenska heilbrigðiskerfinu með því að mennta heilbrigðisstarfsfólk. Á sviðinu starfa margir fremstu sérfræðingar þjóðarinnar í heilbrigðisvísindum við kennslu og rannsóknir.

Háskóli Íslands er stærsta kennslu-, rannsókna- og vísindastofnun Íslands. Háskólinn veitir nemendum víðtæka menntun á öllum helstu fræðasviðum og þjónar stofnunum, fyrirtækjum og stjórnvöldum í þágu almannaheilla. Háskóli Íslands býður fjölbreytt nám á öllum stigum og er eini háskóli landsins sem býður grunnnám og framhaldsnám á öllum helstu fræðasviðum.

Starfshlutfall er 100%

Umsóknarfrestur er til og með 13.06.2025

Nánari upplýsingar veitir

Helga Bragadóttir, [email protected]

Auglýsing birt3. júní 2025

Umsóknarfrestur13. júní 2025

Tungumálahæfni