Umsjón fasteigna

Efling stéttarfélag auglýsir eftir laghentum einstaklingi til starfa við umsjón og eftirlit fasteigna orlofssjóðs Eflingar. Í starfinu felst dagleg umsjón orlofshúsa, ásamt minni viðgerðum og viðhaldi á fasteignum og húsbúnaði. Starfsstöðin er í Reykjavík en ferðalög eru stór hluti af starfinu þar sem orlofshúsin eru staðsett víða um land. Starfið heyrir undir orlofssvið Eflingar þar sem starfsmaður mun starfa í nánu samstarfi með öðrum starfsmönnum sviðsins.

Við leitum að duglegum og þjónustuliprum starfsmanni sem hefur brennandi áhuga á fjölbreyttu og krefjandi starfi. Hann þarf að vera góður í mannlegum samskiptum, geta unnið sjálfstætt, hafa frumkvæði og lausnamiðaða hugsun. Mikilvægt er að viðkomandi hafi hæfileika til að leysa úr ólíkum verkefnum á vettvangi, bregðast fljótt við þegar upp koma óvæntar aðstæður og halda góðu samstarfi við bæði samstarfsfólk, verktaka og félagsfólk Eflingar.