Félag iðn- og tæknigreina – skammstafað FIT – er stærsta einstaka stéttarfélag iðnaðarfólks á Íslandi. Félagar í FIT eru í dag um sjö þúsund talsins en félagið var stofnað árið 2003, þegar hátt í tuttugu félög iðnaðarfólks – sem mörg eiga allt að hundrað ára sögu – runnu saman í eitt. Hagsmunagæsla fyrir félagsfólk er aðalverkefni félagsins en markmið þess er að auka fjárhagslegt öryggi og lífsgæði. Á grundvelli mánaðarlegra gjalda frá félagsfólki starfrækir félagið fimm sjóði: félagssjóð, sjúkrasjóð, menntasjóð, orlofssjóð og vinnudeilusjóð. Félagið kappkostar að veita bæði faglega og hraða þjónustu. Í því skyni rekur félagið fimm skrifstofur; á Stórhöfða í Reykjavík, í Reykjanesbæ, á Selfossi, á Akranesi og í Vestmannaeyjum. FIT hefur verið í fararbroddi stéttarfélaga þegar kemur að innleiðingu tæknilegra nýjunga og er þannig bæði framsækið og öflugt stéttarfélag sem sækir styrk sinn hvoru tveggja í fjölbreytni og stærð. Hjá félaginu er sérstök áhersla á að höfða til ungs fólks á vinnumarkaði. FIT er aðili að Samiðn, sambandi iðnfélaga og Alþýðusambandi Íslands en félagið á einnig aðild að norrænum og alþjóðlegum samtökum.