Leikskólinn Maríuborg er rekinn af Reykjavíkurborg og fer eftir Menntastefnu RVK sem og Aðalnámskrá leikskóla. Einkunnarorð okkar og megingildi eru LEIKUR-SAMSKIPTI-NÁMSGLEÐI og er það grunnurinn að öllu okkar starfi. Við leggjum áherslu á læsi, lífsleikni og umhverfismennt og okkar helstu kennslugögn eru Lubbi finnur málbein, Lífsleikni, Vinátta og Grænfáninn. Öll börn leikskólans fara í jóga og heimspeki/lífsleikni einu sinni í viku og við hittumst öll á föstudögum í söngstund þar sem deildirnar skiptast á að skipuleggja tónlistarstarf eða aðrar uppákomur. Við stöndum á frábærum stað í Grafarholtinu og er stutt í fjölbreytta náttúru, auk þess sem lóðin okkar býður upp á skemmtilega útileiki. Skólinn er bjartur og fallegur og skiptist í fimm deildir, þar af ein í sérstæðu húsi, íþróttasal, kubbastofur tvær og listasmiðju, auk starfsmannarýmis og eldhúss. Starfsmenn hafa gert með sér samskiptasamning og við leggjum mikla áherslu á góð og hreinskipt samskipti innan starfsmannahópsins, sem og barnahópsins.