Geislavarnir ríkisins er um 10 manna stofnun þar sem starfsandi er góður, eins og niðurstöður í könnun Sameykis, Stofnun ársins, sýnir. Hjá Geislavörnum starfar samhentur hópur starfsmanna sem vinnur að fjölbreyttum verkefnum. Geislavarnir bjóða upp á möguleika fyrir starfsmenn að móta eigið starf, góða starfsaðstöðu og hvetjandi starfsumhverfi með sveigjanlegum vinnutíma. Góðir möguleikar eru til starfsþróunar og þáttöku í norrænum og alþjóðlegum verkefnum. Geislavarnir vinna út frá flötu skipuriti og eru með vottað gæðakerfi samkvæmt ISO 9001:2015 staðlinum. Hlutverk Geislavarna er skilgreint í lögum nr. 44/2002. Stofnunin hefur það hlutverk að annast öryggisráðstafanir gegn geislun frá geislavirkum efnum og geislatækjum. STOFNUNIN ANNAST: -Eftirlit og umsjón með að lögum þessum og reglugerðum og reglum settum samkvæmt þeim sé fylgt. -Hvers konar eftirlit og athuganir sem nauðsynlegar eru samkvæmt lögum þessum og reglugerðum eða reglum settum samkvæmt þeim. -Eftirlit með geislaálagi starfsmanna vegna jónandi geislunar og halda skrá yfir niðurstöður einstaklingsbundins eftirlits fyrir hvern einstakan starfsmann. -Reglubundið mat á heildargeislaálagi almennings af starfsemi sem lög þessi taka til. -Reglubundið mat á geislaálagi sjúklinga af læknisfræðilegri geislun hérlendis. -Vöktun og rannsóknir á geislavirkum efnum í matvælum og umhverfi. -Fræðslu um geislavarnir fyrir starfsfólk er vinnur við geislun jafnframt því að miðla upplýsingum til almennings og fjölmiðla. Rannsóknir á sviði geislavarna. -Geislunarlegan þátt viðbúnaðar við hvers kyns geislavá, m.a. greiningu á ógn af hennar völdum, samhæfingu viðbúnaðar við alþjóðleg viðmið, rekstur viðbúnaðar- og geislamælikerfa og annað því tengt. -Nauðsynlega mælifræði og varðveislu landsmæligrunna vegna notkunar jónandi geislunar á Íslandi. -Samvinnu við erlendar stofnanir á sviði geislavarna og kjarnorkumála. -Önnur atriði er lúta að framkvæmd laga þessara og önnur verkefni á sviði geislavarna eftir nánari ákvörðun ráðherra.