Skrifstofustjóri

Umhverfis- og skipulagssvið Reykjavíkurborgar leitar að öflugum stjórnanda til að leiða nýja skrifstofu framkvæmda, viðhalds og eignaumsjónar.

Skrifstofan fer með eigandafyrirsvar með eignum Reykjavíkurborgar, leiðir vinnu við fjárfestingaráætlun og áætlun um kaup og sölu eigna ásamt umsýslu þeirra. Skrifstofan annast og ber ábyrgð á verklegum framkvæmdum þ.m.t. stofnframkvæmdum á vegum Reykjavíkurborgar og sér um viðhald á eignasafni þ.e. húseignum, samgöngumannvirkjum og opnum svæðum.

Hlutverk skrifstofunnar er m.a. að stuðla að sem bestu verklagi, hagkvæmni, gæðum og skilvirkni við stofnframkvæmdir og viðhaldsverkefni á vegum borgarinnar. Skrifstofan gerir frumathuganir vegna framkvæmda við fasteignir, þarfagreiningar, forhönnun, leggur mat á valkosti og gerir frumkostnaðaráætlanir áður en endanleg ákvörðun um framkvæmd er tekin.

Skrifstofustjóri starfar í nánu samstarfi við sviðsstjóra og borgaryfirvöld eftir því sem við á og sinnir eftir þörfum miðlun upplýsinga í samvinnu við stjórnendur bæði innan sviðs og utan. Skrifstofustjóri stýrir skrifstofu og hefur yfirumsjón með verkefnum skrifstofunnar, stefnumótun, fjármálum og mannauðsmálum. Skrifstofustjóri leiðir þróun og uppbyggingu þeirra deilda sem heyra undir skrifstofuna og er í forsvari fyrir þá þjónustu sem veitt er.

Við leitum að einstaklingi með ríka forystuhæfileika, metnað og vilja til að stýra mikilvægri þjónustu og að leiða spennandi breytingar.

Um er að ræða krefjandi og umfangsmikið starf í síbreytilegu og faglegu starfsumhverfi þar sem áhersla er á góða þjónustu og virðingu fyrir umhverfinu. Næsti yfirmaður er sviðsstjóri umhverfis- og skipulagssviðs.