Aðstoðarskólastjóri Salaskóla
Salaskóli er grunnskóli fyrir nemendur í 1. til 10. bekk, staðsettur á grónu svæði við Versali í Kópavogi. Skólinn var stofnaður árið 2001 og fagnar því 25 ára starfsafmæli á þessu ári. Í skólanum eru um 500 nemendur og þar starfar reynslumikið og metnaðarfullt starfsfólk með fjölbreytta menntun og bakgrunn. Rík hefð er fyrir þróunarstarfi í skólanum þar sem m.a. er lögð áhersla á einstaklingsmiðað nám, fjölbreytta kennsluhætti, leiðsagnarnám, teymiskennslu, jákvæðan skólabrag og gott samstarf við foreldra og nærsamfélagið. Í skólanum er rekin sérdeild fyrir börn með einhverfu. Gildi Salaskóla eru vinátta, virðing og samstarf.
Í Salaskóla er rekin frístund fyrir nemendur í 1.- 4. bekk og gott samstarf er við félagsmiðstöðina Fönix sem staðsett er í skólahúsnæðinu.
Kópavogsbær hefur hlotið viðurkenningu Unicef sem barnvænt sveitarfélag og starfar í anda þeirra gilda í allri sinni starfsemi. Stjórnendur grunnskóla starfa samkvæmt lögum um grunnskóla ásamt öðrum lögum er við eiga, aðalnámskrá grunnskóla, kjarasamningum, mannauðs- og menntastefnu Kópavogsbæjar.
Salaskóli auglýsir eftir metnaðarfullum aðstoðarskólastjóra með farsæla starfsreynslu úr grunnskóla og skýra sýn á faglegt skólastarf. Leitað er að einstaklingi sem er tilbúinn að starfa eftir stefnu og gildum skólans, í teymi stjórnenda og í nánu samstarfi við starfsfólk. Aðstoðarskólastjóri er staðgengill skólastjóra og gegnir hlutverki faglegs leiðtoga sem vinnur að uppbyggingu og viðhaldi á jákvæðum skólabrag og öflugu námsumhverfi. Starfið krefst hæfni til að leiða fólk saman, skapa sterka liðsheild og styðja við skólastarfið í nánu samstarfi við skólastjóra, sem og í samvinnu við nemendur, foreldra, samstarfsfólk og skólayfirvöld. Um er að ræða spennandi tækifæri fyrir árangursdrifinn einstakling sem vill leiða áframhaldandi uppbyggingu og þróun skólastarfs í þágu velferðar og farsældar nemenda.
- Er staðgengill skólastjóra og gegnir hlutverki deildarstjóra eins aldursstigs
- Ber, ásamt skólastjóra, ábyrgð á skólastarfinu, daglegri stjórnun þess og rekstri skólans
- Hefur umsjón með að unnið sé samkvæmt lögum, reglugerðum, aðalnámskrá grunnskóla og í samræmi við skólastefnu Kópavogsbæjar
- Hefur umsjón með skipulagi skólastarfs, þar á meðal skólanámskrá, áætlunum og nemendamálum
- Leiðir þróun skólastarfsins, tekur virkan þátt í stefnumótun og umbótastarfi og uppbyggingu skólabrags og skólamenningar
- Tekur þátt í stjórnun mannauðsmála með skólastjóra, sinnir ráðningum og styður við starfsþróun starfsfólks
- Starfar í anda laga og verklags um farsæld barna og stuðlar að velferð og farsæld nemenda í samstarfi við foreldra og fagaðila innan og utan skólans
- Stuðlar að góðu samstarfi í skólasamfélaginu, við foreldra, skólayfirvöld og nærsamfélagið
- Leyfisbréf til kennslu og reynsla af kennslu í grunnskóla er skilyrði
- Framhaldsmenntun (M.Ed., MA, MS, MBA eða Diplóma að lágmarki) á sviði stjórnunar, kennslufræði, uppeldis- og menntunarfræða eða á öðru því fagsviði sem nýtist í starfi
- Reynsla af stjórnun, faglegri forystu og teymisvinnu, þátttöku í skólaþróunarverkefnum auk þekkingar á leiðsagnarnámi og þverfaglegri nálgun í kennslu
- Lausnamiðað hugarfar og farsæl reynsla af úrlausn nemendamála og foreldrasamskiptum
- Leiðtogahæfileikar, lipurð og færni í mannlegum samskiptum
- Frumkvæði og sjálfstæði í vinnubrögðum, jákvæðni, ábyrgðarkennd og skipulagshæfileikar
- Góð íslenskukunnátta og færni til að tjá sig í ræðu og riti
Starfsfólk Kópavogsbæjar fær frían aðgang að sundlaugum bæjarins.
Íslenska
