Á leikskólanum Álfaheiði eru fjórar deildir en á þeim dvelja 79 börn á aldrinum eins til sex ára. Leikskólinn er staðsettur á sunnan verðum Digraneshálsi og er stutt í skemmtileg útivistarsvæði. Starf leikskólans gengur út frá því að börn séu skapandi og getumiklir einstaklingar og því sé mikilvægt að búa til áhugavert umhverfi fyrir þau, jafn innandyra sem utan, þar sem leikur fær að njóta sín. Starfsfólk telur að börn þroskist best í jákvæðu, öruggu, hlýju og tilfinningaríku umhverfi þar sem borin er virðing fyrir þeim og skoðunum þeirra. Því er lögð áhersla á hlýlegt og örvandi umhverfi og er leikskólinn skreyttur með listaverkum eftir börnin. Á leikskólanum Álfaheiði er unnið í anda námsefnisins Lífsmenntar e. Value Based Education en einkunnarorð leikskólans eru „Deilum gildum okkar til að skapa betri heim.“ Á leikskólanum hefur verið unnið markvisst með Barnasáttmála Sameinuðu þjóðanna frá árinu 2010. Álfaheiði er einnig Réttindaskóli UNICEF en í því felst að byggja upp lýðræðislegt umhverfi, standa vörð um réttindi barna og rækta með markvissum hætti þekkingu, leikni og viðhorf sem hjálpar börnum að verða gagnrýnir, virkir og hæfir þátttakendur í samfélaginu okkar.