Tækniþjónustustjóri á umhverfis- og skipulagssviði
Umhverfis- og skipulagssvið Reykjavíkurborgar leitar að öflugum leiðtoga til að leiða tækniþjónustu á skrifstofu borgarlandsins. Um nýtt starf er að ræða en megin hlutverk tækniþjónustustjóra verður að samræma þá þjónustu borgarinnar sem tryggir að innviðir borgarlandsins haldist öruggir á öllum árstímum samhliða því að vera bæði rekstrarhæfir og hagkvæmir. Í því felst að hafa yfirumsjón með rekstri og viðhaldi á stýrikerfum borgarinnar, þ.m.t. umferðaljósum, gatnalýsingu og hitakerfum fyrir göngu og hjólaleiðir. Auk skipulagningu og framkvæmd árstíðarbundinna verkefna á borð við götuhreinsun, grasslátt og vetrarþjónustu.
Við leitum að einstaklingi með ríka forystu- og samskiptahæfileika, styrkleika á sviði reksturs, sterka tæknikunnáttu, metnað og færni til að leiða þjónustuumbætur á nýrri starfseiningu. Um er að ræða fjölbreytt og krefjandi starf í faglegu starfsumhverfi þar sem áhersla er á þverfaglega teymisvinnu, góða þjónustu og virðingu fyrir umhverfinu. Næsti yfirmaður er skrifstofustjóri.
- Stýrir og þróar þjónustu sem tengist tæknikerfum borgarinnar og tryggir að hún sé fagleg og skilvirk.
- Fagleg stjórnun mannauðs, fjármála, skipulags og daglegra verkefna sem heyra undir eininguna.
- Leiðir áætlanagerð, skipulagningu og markmiðasetningu einingarinnar og tryggir að unnið sé í samræmi við stefnu, áherslur og markmið umhverfis- og skipulagssviðs.
- Stuðlar að öruggu vinnuumhverfi og byggir upp öfluga liðsheild og góðan starfsanda.
- Leiðandi hlutverk og þátttaka í starfshópum innan og utan Reykjavíkurborgar.
- Háskólamenntun á framhaldsstigi í viðeigandi fagi, t.d. tæknigreinum, verkfræði, rekstri eða viðskiptum.
- Viðbótarmenntun í stjórnunarfræðum er kostur.
- Stjórnunarreynsla og mikil hæfni í mannlegum samskiptum.
- Sterk tæknileg færni og þekking á rafmagnsmálum. Þekking á tækniinnviðum borgarinnar eða annarra sveitarfélaga er kostur.
- Greiningar- og skipulagshæfni, frumkvæði og þjónustuhugsun.
- Íslenskufærni C1-C2 skv. samevrópska tungumálarammanum og enskufærni B2-C1.
- Þekking á opinberri stjórnsýslu kostur.
Icelandic
English
