Furugrund er sex deilda leikskóli með 97 nemendur. Starfsfólk leikskólans starfar eftir uppeldisstefnu um Jákvæðan aga. Áhersla er lögð á vellíðan barna, sterka tilfinningagreind og lausnamiðaða hugsun sem leiðir til aukins vaxtar og þroska. Einkunnarorð leikskólans eru virðing, hlýja, öryggi og traust og eru þau okkur mikilvæg í öllum samskiptum og framkomu. Borin er virðing fyrir hverjum og einum einstakling og börnunum kennt mikilvægi þess að hlusta á alla og virða skoðanir hvors annars. Öllum í leikskólanum er sýnd hlýja og einnig er ýtt undir mikilvægi samkenndar, umhyggju og vináttu hjá börnunum. Börnunum í Furugrund er tryggt öryggi með stöðugleika í skipulagi og viðmóti þannig að þau upplifi sig örugg í leikskólanum og séu frjáls til að vera þau sjálf. Í leik og starfi er ýtt undir sjálfshjálp barnanna og þeim treyst til að spreyta sig í hvívetna, gera mistök og læra af þeim. Barnasáttmáli Sameinuðu þjóðanna og heimsmarkmið Sameinuðu þjóðanna eru einnig þáttur af okkar stefnu en Furugrund er Réttindaskóli UNICEF en í því felst að byggja upp lýðræðislegt umhverfi, standa vörð um réttindi barna og rækta með markvissum hætti þekkingu, leikni og viðhorf sem hjálpar börnum að verða gagnrýnir, virkir og hæfir þátttakendur í samfélaginu okkar.