Aðstoðarleikskólastjóri

Leikskólinn Austurborg auglýsir stöðu aðstoðarleikskólastjóra. Um er að ræða gefandi stjórnunarstarf í góðu starfsumhverfi barna og fullorðinna ásamt tækifærum til faglegrar starfsþróunar. Leitað er að leikskólakennara með leiðtogahæfileika sem er tilbúinn að leiða áfram metnaðarfullt starf í Austurborg í góðu samstarfi við stjórnendateymi og starfsfólk leikskólans.

Austurborg er fjögurra deilda leikskóli þar sem einkunnarorðin eru: Vil, Get og Kann. Leikskólinn vinnur í anda hugmyndafræði Reggio Emilia með áherslu á hreyfingu og skapandi starf. Austurborg er Leikur að læra skóli og hefur hlotið vottun sem slíkur. Leikur að læra er hugsað út frá þörfum barna til að leika og hreyfa sig og upplifa námsefnið í gegnum mismunandi skynfæri.

Í Austurborg er gott að vera og þar fer fram metnaðarfullt, skemmtilegt og gefandi starf. Leikskólinn er sífelldri þróun og mótun og leggjum við áherslu á góðan starfsanda þannig að hver og einn fá notið sín í starfi. Leikskólinn er miðsvæðis, staðsettur nálægt helstu samgönguæðum borgarinnar.

Í öllu starfi skóla- og frístundasviðs er unnið að innleiðingu Menntastefnu Reykjavíkur, Látum draumana rætast, þar sem leiðarljósin eru virkni og þátttaka barna, aukið samstarf og fagmennska. Stjórnendur í leikskólum borgarinnar eru hluti af fjölmennu teymi fagfólks í öflugu lærdómssamfélagi.