MEKÓ

MEKÓ stendur fyrir Menning í Kópavogi. Í bæjarfélaginu er að finna öflugt menningarlíf og í hjarta Kópavogs er að finna menningarstofnanir bæjarins; Salinn, Gerðarsafn, Náttúrufræðistofu Kópavogs og Bókasafn Kópavogs. Húsin starfa bæði sem sjálfstæðar ólíkar stofnanir en einnig sem heild með það að markmiði að efla samfélagið og auka aðgengi að listum, meðal annars að bjóða upp á fría viðburði sem styrktir eru af Lista- og menningarráði Kópavogs. MEKÓ er einnig í sterkum tengslum við sjálfstætt starfandi menningarlíf utan stofnananna sem taldar eru upp hér að ofan. MEKÓ starfar samkvæmt menningarstefnu Kópavogsbæjar sem samanstendur af hlutverki, framtíðarsýn, gildum og yfirmarkmiðum sem eru fengin úr Heimsmarkmiðum Sameinuðu þjóðanna um sjálfbærni. Menningarstefnan var unnin í samstarfi lista- og menningarráðs og starfsfólks menningarmála. Stefnan felur í sér þrjár stefnuáherslur. 1. Kópavogsbær leggur áherslu á að menningarstarf sé aðgengilegt öllum bæjarbúum. 2. Kópavogsbær stendur vörð um sérstöðu og faglegt starf menningarhúsa bæjarfélagsins. 3. Kópavogsbær leggur áherslu á víðtækt samstarf við bæjarbúa, svið og deildir bæjarins og lista-, fræði-og vísindamenn úr ólíkum áttum.

About

Verkefna- og viðburðastjóri menningarmála í Kópavogi

Kópavogsbær leitar að kraftmiklum og hugmyndaríkum verkefna- og viðburðastjóra menningarmála með skýra framtíðarsýn og brennandi áhuga á listum og menningu. Leitað er eftir einstaklingi sem er tilbúinn að taka þátt í að móta og efla menningarlíf bæjarins með framsæknum og skapandi hætti.

Kópavogsbær er kunnur fyrir öflugt og ríkt menningarstarf sem sniðið er fyrir alla aldurshópa. Kjarnastarfsemin fer fram í menningarhúsunum sem staðsett eru í hjarta bæjarins en þau eru Gerðarsafn, Salurinn, Bókasafn og Náttúrufræðistofa. Nálægð húsanna við líflegt útivistarsvæðið skapar eftirsóknarvert samtal og mýmörg tækifæri til ólíkra menningarviðburða.

Verkefna- og viðburðastjóri mótar og ber ábyrgð á skipulögðu menningarstarfi í samráði við forstöðumann menningarmála. Hann starfar einnig náið með forstöðumönnum annarra menningarhúsa bæjarins og verkefnastjórum þeirra við skipulagða viðburði og mótun nýrra verkefna. Verkefnastjóri sér um skipulagningu hátíða bæjarins og ber faglega ábyrgð á þeim. Hann leiðir einnig fræðslustarf og heimsóknir barna af öllum skólastigum í menningarhúsin.

Meðal þeirra viðburðaraða sem nú eru starfræktar í menningarhúsunum eru fjölskyldustundir, menning á miðvikudögum og foreldramorgnar. Þær reglubundnu hátíðir sem fram fara í bænum eru Ljóðstafur Jóns úr Vör, Barnamenningarhátíð, Safnanótt, 17. júní, haustkarnival og aðventuhátíð.

Leitað er eftir einstaklingi sem er vakandi fyrir nýjum tækifærum og skapandi leiðum til að efla og virkja enn frekar menningar- og listalíf bæjarins.

Næsti yfirmaður er forstöðumaður menningarmála en málaflokkurinn heyrir undir skrifstofu umbóta- og þróunar.

Helstu verkefni og ábyrgð

Ber ábyrgð á og stýrir sameiginlegum viðburðum og hátíðum menningarhúsanna í samstarfi við forstöðumann menningarmála
Skipuleggur og ber ábyrgð á markvissri menningarfræðslu fyrir nemendur af öllum skólastigum í Kópavogi með áherslu á börn og ungmenni
Er tengiliður menningarhúsa bæjarins við menntasvið, skóla, félagsmiðstöðvar, tónlistarskóla, framhaldsskóla, grasrótarsamtök og aðra þá sem sinna menningu og listum innan bæjarins
Leiðir og stýrir hópi viðburðafulltrúa menningarhúsanna og skipuleggur viðburða- og hátíðardagskrá fram í tímann í samstarfi við þá
Er tengiliður menningarmálaflokksins við systurstofnanir á höfuðborgarsvæðinu og víðar
Í samvinnu við forstöðumann menningarmála ber verkefnastjóri fjárhagslega ábyrgð á rekstri verkefna sem undir hann heyra, sér um fjárhagsáætlunargerð og um gerð samninga við verktaka
Leiðir gerð árlegrar skýrslu um starfsemi menningarmála í Kópavogi

Menntunar- og hæfniskröfur

Háskólamenntun sem nýtist í starfi, menntun á sviði lista og/eða menningar er kostur
Reynsla og/eða víðtæk þekking á sviði lista og menningarmála
Reynsla af verkefnastjórnun og skipulagningu dagskrárviðburða
Reynsla af því að vinna með börnum og ungmennum er kostur
Reynsla af fjárhagsáætlunargerð, stefnumótunarvinnu og skýrslugerð er kostur
Framúrskarandi færni í mannlegum samskiptum og lausnamiðuð vinnubrögð
Hugmyndaauðgi, frumkvæði og sjálfstæði í vinnubrögðum
Færni til að leiða saman ólíka hópa og verkefni
Geta til að vinna fjölbreytileg störf undir álagi og í sumum tilfellum utan hefðbundins dagvinnutíma
Hæfni til að setja fram texta og tal á íslensku og ensku