Umhverfis- og skipulagssvið Reykjavíkurborgar

Starfsfólk umhverfis- og skipulagssviðs vill auka lífsgæði í Reykjavík með framúrskarandi þjónustu og metnaði fyrir enn betri borg. Áhersla er á að gera vinnuumhverfi starfsfólks aðlaðandi, öruggt og skilvirkt. Gildi sviðsins eru virðing fyrir umhverfinu, fagmennska í hverju verki og þjónusta við umhverfið.

About

Deildarstjóri umbóta og upplýsingamála

Umhverfis- og skipulagssvið Reykjavíkur leitar að öflugum leiðtoga í nýtt starf deildarstjóra á skrifstofu skipulags- og byggingarmála.

Deildin ber ábyrgð á upplýsingakerfum, verkferlum og að innleiða umbætur og lausnir er varða skipulags og byggingarmál (s.s. landupplýsingakerfi, borgarvefsjá, umsóknarkerfi vegna framkvæmdaleyfa, staðlaðra umsagna o.fl.). Stýrir fræðslu og upplýsingagjöf til hagaðila varðandi ferli skipulags- og byggingarmála og afgreiðir erindi þar um. Heldur utan um grenndarkynningar, smærri deiliskipulagsbreytingar, umsagnir til opinberra aðila og almenn afgreiðslumál skrifstofunnar. Ber ábyrgð á að málsmeðferð, upplýsingagjöf og áherslur séu í samræmi við stefnu borgaryfirvalda varðandi stafrænar lausnir og í takt við vandaða stjórnsýsluhætti og markmið sviðsins um framúrskarandi þjónustu.

Leitað er að framsæknum einstaklingi með ríka forystu- og samskiptahæfileika, frumkvæði og þjónustumiðaða hugsun sem hefur brennandi áhuga á að innleiða umbætur og nýjar tæknilausnir í þjónustu sviðsins í skipulags og byggingarmálum.

Um er að ræða fjölbreytt og krefjandi starf í faglegu starfsumhverfi þar sem áhersla er á þverfaglega teymisvinnu, góða þjónustu og virðingu fyrir umhverfinu. Næsti yfirmaður er skrifstofustjóri skipulags-og byggingarmála.

Helstu verkefni og ábyrgð

Ábyrgð á faglegu starfi, uppbyggingu og skipulagi deildar og að málsmeðferð og áherslur verkefna séu í samræmi við stefnu borgaryfirvalda í umhverfis- og skipulagsmálum.
Ábyrgð á umbótaverkefnum og eflingu stafrænna þjónustuleiða.
Leiðandi hlutverk við þróun verkefnamiðaðrar teymisvinnu.
Þátttaka í stefnumótun og áætlanagerð skrifstofu skipulags og byggingarmála.
Forsvar fyrir þjónustu, fagleg stjórnun mannauðs, fjármála, skipulags og daglegra verkefna
auk ábyrgðar á rekstri.
Leiðir áætlanagerð, skipulagningu og markmiðasetningu og tryggir að unnið sé í samræmi við stefnu, áherslur og markmið umhverfis- og skipulagssviðs.
Samskipti og samráð við íbúa, hagsmunaaðila, ráðgjafa og stofnanir, nefndir og ráð, skrifstofur og deildir innan og utan borgarkerfis.

Menntunar- og hæfniskröfur

Háskólapróf á framhaldsstigi sem nýtist í starfi.
Viðbótamenntun á sviði stjórnunar, verkefnastjórnunar eða opinberrar stjórnsýslu kostur.
Farsæl reynsla á starfssviðinu áskilin.
Hæfni til að setja fram skýr markmið, forgangsraða verkefnum og fylgja eftir.
Farsæl reynsla af stefnumótun, verkefnastjórnun og innleiðingu umbótaverkefna.
Mjög góð tölvu- og tæknikunnátta og umbótamiðuð hugsun varðandi tæknilausnir.
Góðir hæfileikar til samskipta og samvinnu og hæfni til að skapa öfluga liðsheild.
Greiningar- og skipulagshæfni, frumkvæði og lausnamiðuð nálgun.
Reynsla af stjórnun og áætlanagerð og þekking á opinberri stjórnsýslu er kostur.
Þekking á skipulags- og byggingarlögum og viðkomandi reglugerðum er kostur.
Íslenskukunnátta C1-C2 skv. samevrópskum tungumálaramma og enskukunnátta B2-C1.

Nánar um starfið
Á umhverfis- og skipulagssviði er unnið að fjölbreyttum verkefnum sem auðga mannlífið í borginni. Leiðarljós sviðsins eru aukin lífsgæði í Reykjavík með framúrskarandi þjónustu og metnaði fyrir enn betri borg og þar gegnir starfsfólkið lykilhlutverki með einstakri fagþekkingu í þeim málaflokkum sem sviðið sinnir.

Um er að ræða 100% starf og æskilegt er að starfsmaður geti hafið störf sem fyrst. Launakjör eru samkvæmt kjarasamningi Reykjavíkurborgar og hlutaðeigandi kjarafélags.

Umsækjendur skulu senda inn ferilskrá (hámark 2 bls.) ásamt kynningarbréfi (hámark 1 bls.), bæði á íslensku. Þar skal gera grein fyrir þeirri þekkingu, reynslu og hæfni umsækjanda sem nýtist til að sinna starfinu í samræmi við hæfniskröfurnar í auglýsingunni.

Við ákvörðun um boðun í starfsviðtal verður horft til gæða umsóknargagna. Gert er ráð fyrir að viðtöl fari fram í viku 27 og 28. Umsækjendum sem komast lengra áfram í ráðningarferlinu verður gert að leysa verkefni. Auk annarra hæfnisþátta koma verkefnin heildstætt inn í mat á hæfni umsækjenda til að sinna starfinu. Við ákvörðun um ráðningu verður, auk framangreindra hæfnisviðmiða, tekið mið af frammistöðu í starfsviðtali og umsagna sem aflað er.

Vakin er athygli á stefnu Reykjavíkurborgar um jafnan hlut kynja og að vinnustaðir borgarinnar endurspegli það margbreytilega samfélag sem borgin er.

Umsóknarfrestur er til og með 30. júní 2025

Umsjón með starfsumsókninni hafa Auður Bjarnadóttir, [email protected] og
Garðar Óli Ágústsson, [email protected] hjá Vinnvinn.