Ásgarðsskóli er sjálfstætt starfandi grunnskóli sem starfar alfarið á netinu. Skólinn hefur heimilisfesti í Reykhólasveit en þjónustar nemendur um allt land. Í Ásgarðsskóla er lögð áhersla á einstaklingsmiðað nám þar sem nemendur vinna annað hvort sjálfstætt eða í teymum. Kennslan er sveigjanleg og sniðin að þörfum hvers og eins, þar sem nemendur móta sínar eigin námsáætlanir í samstarfi við kennara. Starfsemi skólans byggir á samþættingu þekkingar og færni, þar sem nemendur taka virkan þátt í námi sínu með leiðsögn kennara. Skólinn leggur áherslu á fjölbreytta kennsluhætti, leiðsagnarnám og nemendastýringu, sem tryggir að hver nemandi fái stuðning og hvatningu í samræmi við eigin þarfir og hæfni. Ásgarðsskóli hefur sterkt stuðningsnet fyrir nemendur þar sem náms- og starfsráðgjafi, skólahjúkrunarfræðingur og skólasálfræðingur eru til staðar. Skólinn starfar með foreldrum og forsjáraðilum til að tryggja heildræna nálgun að velferð nemenda. Við leitum að metnaðarfullum einstaklingum sem vilja vera hluti af skapandi og framsæknu skólasamfélagi þar sem gæði námsins og velferð nemenda eru í fyrirrúmi.