Þarfir barna á tveimur heimilum
Skólinn er einn helsti vettvangurinn fyrir geðrækt barna, þroska þeirra og félags- og tilfinningafærni. Rannsóknir sýna að börn sem reynt hafa skilnað foreldra sinna og/eða búa á tveimur heimilum geta haft sértækari þarfir en önnur börn. Birtingarmyndir þess geta verið tengdar námsárangri, félagslegum þroska og inn- og úthverfum vanda og koma gjarnan fram innan veggja skólans. Því gegnir starfsfólk leik- og grunnskóla lykilhlutverki í lífi barna sem búa á tveimur heimilum.
Á námskeiðinu, sem er fyrir starfsfólk leik- og grunnskóla, verður fjallað um líðan barna sem búa á tveimur heimilum og álagið sem því fyrirkomulagi getur fylgt. Farið verður yfir hvaða áhrif samvistarslit foreldra geta haft á þroska, aðlögun og afdrif barna. Lögð er áhersla á að þátttakendur kynnist gagnlegum nálgunum og hagnýtum aðferðum sem stuðla að stöðugleika, fyrirsjáanleika og vellíðan barnsins innan skólakerfisins. Á námskeiðinu verður stuðst við fræðilega og faglega nálgun á viðfangsefnið.
Kennarar eru Ragnheiður Guðrúnardóttir og Davíð Östergaard, skilnaðarráðgjafar hjá SES-Pro og foreldrar barna á tveimur heimilum.