Töfrarnir á bak við Dumplings

Fyrir hvern:

Matreiðslumenn, kokka, starfsfólk í eldhúsum og annað fagfólk í veitingageiranum sem vill auka þekkingu sína á asískri matargerð og tileinka sér faglegar aðferðir við gerð dumplings.

Markmið:

Að þátttakendur öðlist hagnýtan skilning á helstu þáttum dumplings-gerðar og geti undirbúið fyllingar, útbúið deig, mótað dumplings með mismunandi aðferðum og valið viðeigandi eldunaraðferð til notkunar í faglegu eldhúsi.

Lýsing:

Á þessu tveggja daga verklega námskeiði kynnast þátttakendur helstu hráefnum, kryddum og bragðsamsetningum sem einkenna suður-asískar dumplings. Farið er yfir gerð kjöt- og grænmetisfyllinga, deigs og wrappers, ásamt hefðbundnum mótunar- og lokunaraðferðum. Þátttakendur vinna með mismunandi eldunaraðferðir, svo sem gufusuðu, suðu og pönnusteikingu, og læra hvernig skipuleggja má skilvirka framleiðslu sem stenst kröfur faglegra eldhúsa.

Á námskeiðinu verður fjallað um:

• Helstu hráefni, krydd og bragðefni í asískri dumplings-gerð.
• Gerð kjöt- og grænmetisfyllinga.
• Gerð deigs og wrappers.
• Hefðbundnar mótunar- og lokunaraðferðir.
• Gufusuðu, suðu, pönnusteikingu og aðrar eldunaraðferðir.
• Skipulag framleiðslu og vinnuferla í atvinnueldhúsi.
• Verklega vinnu frá undirbúningi hráefna til fullbúinnar framreiðslu.

Aðrar upplýsingar:

Kennari námskeiðsins er Kunsang Tsering Tamang, meðeigandi og yfirkokkur Ramen Momo á Íslandi. Hann sérhæfir sig í ekta asískri matargerð og stundaði nám í ramen og japanskri matargerðartækni í Osaka í Japan.

Á starfsferli sínum hefur Kunsang þróað uppskriftir, þjálfað matreiðslumenn og stýrt faglegum eldhústeymum með áherslu á hefðbundnar aðferðir sem aðlagaðar eru að nútíma veitingarekstri. Í kennslu sinni leggur hann sérstaka áherslu á hagnýta færni, nákvæm vinnubrögð, stöðug gæði og þau faglegu vinnubrögð sem einkenna öflug eldhús.