N1

Við erum til staðar fyrir fólk og fyrirtæki um allt land þegar þarf að stoppa, fylla á, hlaða, grípa nauðsynjar, fá sér bita eða redda bílnum. Á stöðvunum okkar mætast eldsneyti og raforka, rekstrarvörur, veitingar og ýmis praktísk þjónusta sem nýtist í dagsins amstri. Við leggjum áherslu á að hafa hlutina einfalda. Gott aðgengi, skýr þjónusta og vöruúrval sem mætir ólíkum þörfum, hvort sem þú ert á langferð, á leið í vinnu eða með rekstur. Með N1 kortinu safnarðu punktum sem nýtast sem krónur í verslunum okkar um land allt. Vel staðsett stöðvanet, öflug bílaþjónusta, til dæmis dekkja- og smurþjónusta, og traust fyrirtækjaþjónusta gera okkur að sterkri heild og föstum hluta af daglegu lífi á Íslandi.

Mannauðsstefnan okkar byggir á einföldu atriði. Mikilvægasti auðurinn er fólkið. Við viljum laða að og halda í hæft og traust starfsfólk með góðu starfsumhverfi, skýrum samskiptum og stuðningi í daglegu starfi. Öll eiga að fá sanngjörn tækifæri til að læra, vaxa og þróast og finna traust til að spyrja, prófa og láta í sér heyra.

Við leggjum áherslu á góða móttöku nýliða og fræðslu sem nýtist strax. Við rekum okkar eigin skóla og kennslan er bæði rafræn og staðbundin, þannig að fólk geti náð tökum og byggt ofan á færnina sína í starfi.

Heilsa og líðan starfsfólks skipta máli. Við leggjum áherslu á heilsutengdar forvarnir og vinnum að því í samstarfi við Heilsuvernd. Fólkið okkar er fjölbreytt og það skapar góðan vinnustað. Yfir árið bjóðum við upp á viðburði sem eru skipulagðir af starfsmannafélaginu, starfsfólkinu eða vinnustaðnum. Við fylgjumst reglulega með starfsanda og líðan. Árlega er lögð fyrir vinnustaðagreining þar sem heildaránægja er mæld og gripið til aðgerða ef þörf er á.

Jafnrétti er haft í forgrunni í ákvörðunum sem snúa að mannauði. Öll eiga að vera metin að eigin verðleikum og njóta sanngirni í kjörum. Jafnlaunastefna N1 gildir um allt starfsfólk og tryggir að greidd séu jöfn laun fyrir sambærileg eða jafnverðmæt störf, óháð kyni. Við viljum vinnustað þar sem öll geta liðið vel. Einelti, áreitni og ofbeldi eiga ekki heima hjá okkur og við bregðumst við ef eitthvað fer úrskeiðis.

Gott aðgengi að upplýsingum skiptir máli. Við leggjum áherslu á að miðla upplýsingum skýrt og á réttum tíma, þannig að starfsfólk geti sinnt starfi sínu vel og náð árangri. Við vinnum einnig að því að aðstaða og búnaður sé eins og best verður á kosið, innan þeirra aðstæðna sem hver staður býður upp á, svo vinnan flæði og dagurinn gangi vel.