Tengir hf. er fjarskiptafyrirtæki sem á og rekur ljósleiðaranet. Fyrirtækið var stofnað á Akureyri árið 2002, með það að markmiði að byggja upp ljósleiðaranet á Eyjafjarðarsvæðinu. Uppbygging ljósleiðaranets Tengis hefur verið stöðug frá upphafi en fyrstu árin var áhersla lögð á að leggja ljósleiðara þar sem mest þörf var fyrir mikla flutningsgetu, s.s. í stofnanir sveitafélaga, framhaldsskóla, háskóla og sjúkrahús. Starfssvæði Tengis hefur stækkað jafnt og þétt og hefur markvisst verið unnið að uppbyggingu á framtíðar fjarskiptaneti. Í dag nær fjarskiptanet Tengis um nánast allt norðausturland, auk þess að Tengir á ljósleiðaranet um Vopnafjarðarhrepp og á Vatnsnesi. Ljósleiðaranet Tengis liggur því um fjölmörg sveitarfélög; Akureyrarbæ, Dalvíkurbyggð, Eyjafjarðarsveit, Fjallabyggð, Grýtubakkahrepp, Húnaþing vestra, Hörgársveit, Langanesbyggð, Norðurþing, Skútustaðahrepp, Svalbarðsstrandarhrepp, Tjörneshrepp, Vopnafjarðarhrepp og Þingeyjarsveit. Flestir þéttbýliskjarnar þessarra sveitarfélaga hafa verið tengdir við ljósleiðaranet Tengis. Markmið Tengis er að öllum íbúum á starfssvæði félagsins muni standa til boða að nýta sér framúrskarandi fjarskipti um ljósleiðaranet í eigu heimamanna sem rekið er af heimamönnum. Ljósleiðari Tengis er því rekinn sem ,,opið kerfi” - sem þýðir að allar þjónustuveitur og fjarskiptafélög geta nýtt ljósleiðara Tengis til að bjóða viðskiptavinum upp á internetþjónustu.