Laus störf Hæfnileit Vinnustaðir Námskeið

Umhverfis-, orku- og loftslagsráðuneytið

Hlutverk umhverfis-, orku- og loftslagsráðuneytisins er að skapa umgjörð um umhverfisvernd og sjálfbæra nýtingu náttúrugæða með velferð og jafnrétti kynslóðanna að leiðarljósi. Verkefni umhverfis-, orku- og loftslagsráðuneytisins varða meðal annars umhverfis- og náttúruvernd, loftslagsmál, orkumál og sjálfbæra nýtingu auðlinda. Ráðherra fer með yfirstjórn ráðuneytisins og ber ábyrgð á öllum stjórnarframkvæmdum þess. Ráðuneytisstjóri stýrir ráðuneytinu undir yfirstjórn ráðherra. Skrifstofur ráðuneytisins eru fjórar samkvæmt skipuriti þess: skrifstofa ráðuneytisstjóra, skrifstofa alþjóðamála, skrifstofa umhverfis og orku og skrifstofa loftslags og náttúru. Innan ráðuneytisins starfa einnig fjögur fagteymi. Fagteymin eru Orkuteymi, Hringrásar- og umhverfisteymi, sem starfa á skrifstofu umhverfis og orku, ásamt Loftslags- og náttúruvárteymi og náttúruverndar og menningarminjateymi, sem starfa innan skrifstofu loftslags og náttúru.

Vinnustaðurinn

Sérfræðingur á sviði loftslagsmála og náttúruvár með áherslu á aðlögunaráætlun

Umhverfis-, orku- og loftslagsráðuneytið leitar að sérfræðingi á sviði aðlögunar að loftslagsbreytingum sem hefur brennandi áhuga á að starfa í efstu stjórnsýslu landsins við að móta framtíð málaflokksins.

Um er að ræða fjölbreytt verkefni tengd loftslagsmálum í lifandi starfsumhverfi þar sem áhersla er lögð á teymisvinnu og skipulögð vinnubrögð.

Staðan er á skrifstofu loftslagsmála sem hefur það megin markmið að fylgja eftir loftslagsstefnu stjórnvalda. Megin áherslur eru að draga úr losun gróðurhúsalofttegunda og vinna að aðlögun íslensks samfélags að loftslagsbreytingum ásamt verkefnum um náttúruvá utan ofanflóðamála og stefnu þar um. Verkefnin snúa að því að halda utan um stefnumótun og löggjöf sem varðar loftslagsmál, náttúruvá, aðgerðaáætlun í loftslagsmálum og aðlögunaráætlun vegna loftslagsbreytinga. Þá er útfærsla og framkvæmd alþjóðasamninga á sviði loftslagsmála og Evrópulöggjöf í brennidepli. Auk þess sinnir skrifstofan málefnum vegna loftmengunar, veðurþjónustu, loftslagsþjónustu, og vöktun náttúruvár og stefnumótum um náttúruvá sem fellur ekki undir starfssvið Ofanflóðanefndar, þ.m.t. stefnumótun og hættumat vegna veðurfars, vatnsflóða, sjávarflóða og jarðskjálfta og eldgosa.

Helstu verkefni og ábyrgð

Sérfræðingur á sviði loftslagsmála og náttúruvár með áherslu á aðlögunaráætlun tekur þátt í og leiðir verkefni á skrifstofunni með áherslu á aðlögunaraðgerðir, vöktun og stefnumótun, sinnir afgreiðslu mála, stjórnsýslu, alþjóðlegu samstarfi, eftirfylgni og ráðgjöf. Sérfræðingurinn mun sérstaklega leiða og taka þátt í vinnu er snýr að faglegri eftirfylgni aðlögunaráætlunar, þ.m.t. viðkvæmni- og áhættumati vegna áhrifa loftslagsbreytinga ásamt vinnu við stefnumótun og hættumat vegna náttúruvár utan ofanflóða. Sérfræðingurinn vinnur náið með verkefnisstjóra aðlögunaráætlunar. Þá tekur sérfræðingur á sviði loftslagsmála og náttúruvár þátt í vinnslu frumvarpa, reglugerða og upptöku Evrópuregluverks. Starfið felur einnig í sér samstarf innan ráðuneytisins, við önnur ráðuneyti, stofnanir og ýmsa hagaðila.

Menntunar- og hæfniskröfur

Háskólamenntun á meistarastigi sem nýtist í starfi.
Góð þekking á sviði loftslagsmála og/eða náttúruvár á Íslandi.
Reynsla á sviði opinberrar stjórnsýslu er kostur.
Þekking eða reynsla á sviði loftslagsáhættu og/eða aðlögun að loftslagsbreytingum er kostur.
Góð stafræn færni og lausnamiðuð hugsun.
Frumkvæði, skipulögð vinnubrögð, sjálfstæði í starfi.
Mjög góðir samstarfs- og samskiptahæfileikar og geta til að vinna í teymi.
Mjög gott vald á íslensku og færni til að tjá sig í ræðu og riti.
Mjög góð kunnátta í ensku.