Laus störf Hæfnileit Vinnustaðir Námskeið

Reykjavíkurborg - Velferðarsvið

Velferðasvið ber ábyrgð á áætlanagerð, samhæfingu og samþættingu verkefna á sviði velferðarþjónustu, eftirliti í samræmi við lög, reglur, samþykktir og pólitíska stefnu í velferðarmálum, mat á árangri og þróun velferðarþjónustu og nýrra úrræða og gerð þjónustusamninga um framkvæmd þjónustunnar. Velferðarsvið býr Reykjavíkurborg ennfremur undir að taka við nýjum velferðarverkefnum frá ríki svo sem í málefnum fatlaðra, öldrunarþjónustu og heilsugæslu. Velferðarsvið ber ábyrgð á framkvæmd þjónustu á sviði velferðarmála, þar með talinni félagsþjónustu fyrir alla aldurshópa og barnavernd. Velferðarsvið ber ábyrgð á rekstri þjónustumiðstöðva Reykjavíkurborgar og starfseininga sem undir þær heyra. Velferðarsvið vinnur með velferðarráði og barnaverndarnefnd og sinnir málefnum þeirra. Þjónustumiðstöðvar vinna með hverfaráðum í hverfum borgarinnar. Velferðarsvið sér einnig um rekstur miðlægrar velferðarþjónustu þvert á borgina, átaksverkefna vegna endurhæfingar fólks, heildstæðu forvarnastarfi í Reykjavík, inntöku í húsnæðis- og búsetuúrræði, rekstur hjúkrunarheimila, rekstur framleiðslueldhúss og rekstur heimahjúkrunar í Reykjavík samkvæmt samningi við ríkið þar um.

Vinnustaðurinn

Næringarfræðingur í SELMU-teymi

Velferðarsvið Reykjavíkurborgar auglýsir eftir næringarfræðingi í 80-100% starf til að byggja upp og sinna næringarráðgjöf fyrir heimaþjónustu í Reykjavík. Næringarfræðingurinn mun tilheyra þverfaglegu öldrunarteymi, SELMU. SELMA er þjónusta sem hefur það að markmiði að styðja enn frekar við sjálfstæða búsetu aldraðra í eigin húsnæði og sinnir teymið sérhæfðri meðferð aldraðra með vitjunum í heimahús.

Áhersla er lögð á einstaklingsmiðaða og sveigjanlega þjónustu til að bæta líðan og almenn lífsgæði hrumra aldraðra og gera þeim kleift að búa lengur heima. SELMA hefur aðsetur í húsnæði Læknavaktarinnar í Austurveri og starfar þvert á alla heimaþjónustu Reykjavíkur. Teymið vinnur í nánu samstarfi við heimahjúkrun og endurhæfingarteymi Reykjavíkurborgar að þróun og uppbyggingu á auknu eftirliti, mati og meðferð skyndilegra og/eða flókinna heilsufarsvandamála hrumra einstaklinga í heimahúsi.

Menntunar- og hæfniskröfur

Næringarfræðingur með íslenskt starfsleyfi.

Framhaldsmenntun í klínískri næringarfræði æskileg.

Góð þekking, færni og reynsla af mati og ráðgjöf vegna næringarástands hrumra einstaklinga.

Þekking og reynsla af sjúkraskrárkerfinu SÖGU æskileg.

Framúrskarandi hæfni og lipurð í mannlegum samskiptum.

Frumkvæði, skipulagsfærni og hæfni til að vinna sjálfstætt.

Hreint sakavottorð í samræmi við lög sem og reglur Reykjavíkurborgar.

Helstu verkefni og ábyrgð

Þróun og skipulag á nýrri þjónustu næringarfræðings til skjólstæðinga heimahjúkrunar í Reykjavík.

Umsjón og framkvæmd á fræðslu og stuðningi við starfsmenn heimahjúkrunar vegna næringar hrumra í heimahúsi.

Mat á næringarástandi, uppsetning og eftirfylgd næringarmeðferðar fyrir skjólstæðinga heimahjúkrunar.