Dalur er fjögurra deilda leikskóli og þar geta dvalið 82 börn. Einkunnarorð skólans eru virðing, ábyrgð og sjálfstæði. Leikskólinn Dalur leggur megináherslu á gæði í samskiptum til að tryggja öryggi og vellíðan barna í leikskólanum sem fylgir þeim út í lífið. Samskipti eru grundvallarþáttur í öllu starfi leikskólans en daglega fara fram margvísleg samskipti milli ýmissa aðila s.s barna, foreldra og kennara. Lögð er áhersla á að vandað sé til þeirra samskipta sem fram fara innan leikskólans. Með umgengni við aðra læra börn undirstöðuatriði í samskiptum, þroska félagslega færni sína og sjálfsmynd. Leikskólinn er hluti af lífi flestra barna í dag en þar er þeim tryggt öryggi, fagleg umönnun og nám við sitt hæfi. Uppeldisstefna og hugmyndafræði Dals byggir á kenningum John Dewey "learning by doing" ásamt kenningu um samskipti barna og fullorðinna eftir Berit Bae.