Víðistaðakirkja heyrir til hinni íslensku þjóðkirkju, sem er evangelísk lútersk kirkja - og er söfnuður fólks sem búsett er í Víðistaðasókn í Hafnarfirði. Kirkjan er ekki eingöngu fallegt guðhús með einstæðum listaverkum í hrauninu við Víðistaðatún, heldur fyrst og fremst hreyfing fólks sem á samleið í trúnni á Guð sem Jesús Kristur birtir og boðar. Víðistaðakirkja vill byggja upp sýnilegt, litríkt og vaxandi samfélag sem vekur og nærir kristna trúariðkun og andlegt líf, leggur áherslu á að mæta sérhverri manneskju þar sem hún er stödd á lífsleiðinni, veitir liðsinni og skjól - hvort sem hún tilheyrir Þjóðkirkjunni eða ekki. Þá er það markmið Víðistaðakirkju að virkja fólk í starfi sínu og efla það til þjónustu við Guð og náungann.