Viðhald og uppsetning iðnaðarhurða

Starfið felur í sér vinnu við viðhald og uppsetningu á ýmiskonar hurðum, hliðum og öðrum skildum tækjabúnaði.
Starfinu fylgir nokkur líkamleg áreynsla, þó það sé breytilegt eftir verkefnum. Oft er unnið á tröppum, í stiga, á vinnupalli eða vinnulyftu.
Af og til unnið í kringumstæðum þar sem lágt er til lofts eða þrengsli.

Vinnan snýst að verulegu leiti um greiningu vandamála, bæði á vél-, raf- og tölvubúnaði. Áhugi á að leysa vandamál og skila góðu verki er nauðsynlegur. Gagnlegt er að umsækjandi hafi reynslu eða menntun af einhverju sem nýtist við starfið (vélvirkjun, rafvirkjun, vélstjórn...)

Megnið af vinnunni fer fram víðsvegar um höfuðborgarsvæðið, utan bækistöðvar vinnustaðarins.
Um helmingur vinnunar fer fram utandyra en er eftir bestu getu hagað eftir veðurfari.
Hluti vinnu fer fram utan höfuðborgarsvæðisins, nokkrum sinnum á ári jafnvel á vestfjörðum, norður- eða austurlandi.

Mörg verkefni eru í smærri kantinum, þannig að ekki sé þörf á að fleiri en einn séu við verkið. Í þeim tilvikum þar sem umfang verks er meira en svo að einn ráði við með góðu, fara tveir eða fleiri saman í verkið. Ef einn er verkefnalaus og annar getur þegið hjálp, er þó alltaf gott að nýta tækifærið og létta undir með samstarfsmönnum.

Vinnutími er almennt 8-17 virka daga. Af og til lengri dagar þegar mikið liggur við. Styttri dagar mögulegir eftir atvikum, ef starfsmaður óskar þess. Hugsanleg helgarvinna og bakvaktir, sé áhugi fyrir slíku.

Fyrirkomulag starfsins og vinnutími eru ekki algerlega niðurnjörvuð og margvíslegir möguleikar koma til greina, eftir því hvað best fellur að hæfileikum, aðstæðum og þörfum þess sem hreppir starfið.

Ýmislegt má læra í starfinu og öðlast reynslu sem gagnast á mörgum sviðum.