Akureyri

Akureyrarbær er stór vinnustaður með rúmlega 2.000 starfsmenn. Á hverju vori fjölgar starfsfólki um nálægt 1.200 manns vegna sumarafleysinga og vinnuskólans. Starfsfólk Akureyrarbæjar sinnir margvíslegum verkefnum sem tryggja velferð og ánægju íbúa Akureyrar, hvort sem um er að ræða störf við leik- eða grunnskóla, íbúakjarna, rekstur mannvirkja, stjórnsýslu eða annað.

Vinnustaðurinn

Verkefnastjóri fasteignaskráningar og lóðarskrárritunar

Þjónustu- og skipulagssvið Akureyrarbæjar óskar eftir að ráða metnaðarfullan verkefnastjóra fasteignaskráningar og lóðarskrárritunar. Um er að ræða 100% stöðu sem er ótímabundin. Upphaf ráðningar er samkomulag en æskilegt er að viðkomandi geti hafið störf sem fyrst.

Næsti yfirmaður er byggingarfulltrúi.

Þjónustu- og skipulagssvið er stoðsvið sem ber ábyrgð á þjónustuferlum, stafrænum umbreytingum, skipulags- og byggingarmálum og daglegri stjórnun þeirra málaflokka, skipulagi umferðarmála og landfræðilegs upplýsingarkerfis Akureyrarbæjar (LUKA). Þá ber sviðið einnig ábyrgð á  markaðs- og menningarmálum.

Verkefnastjóri verður hluti af öflugu teymi starfsmanna byggingarfulltrúa og skipulagsfulltrúa.

Helstu verkefni og ábyrgð

Stofna lóðir, útbúa stofnskjöl, yfirlýsingar og lóðarleigusamninga.

Ýmis lóðamál sem upp koma s.s. að halda utan um rétta skráningu lóða og finna upplýsingar fyrir íbúa um lóðir sínar.

Halda utan um upplýsingar um eignarhald á landi, m.a. vegna deiliskipulagsvinnu

Er kerfisstjóri fyrir skráningarkerfi fasteigna og sér um skráningu nýrra lóða nýbygginga, eignaskiptayfirlýsinga, breytingu lóðarstærða, uppfærir og breytir byggingarstigum, keyrir skráningartöflur í kerfið og tilkynnir breytta notkun eigna.

Menntunar- og hæfniskröfur

Háskólamenntun (BA, BS eða B.Ed) á sviði landupplýsinga, á tæknisviði eða önnur sambærileg háskólamenntun sem nýst getur í starfi.

Góð almenn tölvukunnátta er nauðsynleg.

þekking á teikniforritum svo sem MicroStation er kostur.

Þekking á skjalavörslukerfum, s.s. ONE system er kostur.

Framúrskarandi hæfni í samskiptum og rík þjónustulund.

Sjálfstæði og frumkvæði í starfi.

Færni í að tileinka sér nýjungar.

Góð íslenskukunnátta og hæfni til þess að tjá sig í ræðu og riti.

Gerð er krafa um vammleysi, s.s. að vera með gott orðspor og að framkoma og athafnir á vinnustað og utan hans samrýmist starfinu.

Tekið verður tillit til Mannréttindastefnu Akureyrarbæjar um jafnréttismál við ráðningu í starfið.

Laun eru samkvæmt kjarasamningi Sambands íslenskra sveitarfélaga og viðkomandi stéttarfélags.