Röst sjávarrannsóknasetur er dótturfélag Transition Labs sem vinnur með sumum af metnaðarfyllstu verkefnum heims á sviði loftslagslausna. Röst sjávarrannsóknasetur er óhagnaðardrifið rannsóknarfélag sem stofnað var sem hluti af alþjóðlegu neti rannsóknastöðva undir hatti Carbon to Sea Initiative. Carbon to Sea er óhagnaðardrifin bandarísk sjálfseignarstofnun sem er starfrækt með stuðningi góðgerðasamtaka og vísindasjóða á sviði loftslagsmála. Röst sjávarrannsóknarsetur, í samstarfi við Carbon to Sea Initiative, hyggst standa að rannsóknum á aukinni basavirkni sjávar (e. Ocean Alkalinity Enhancement). Tilgangur Carbon to Sea er að rannsaka hvort aukning á basavirkni hafsins (e. Ocean Alkalinity Enhancement, OAE) sé raunhæf, skilvirk, örugg og varanleg leið til þess að fjarlægja koldíoxíð úr andrúmsloftinu og þannig hreinsa upp fortíðar- og nútíðar útblástur gróðurhúsalofttegunda af mannavöldum. Rannsóknaráætlun Carbon to Sea byggist á vegvísi þar sem þverfagleg vísindateymi gera grunnrannsóknir og mælingar, verkfræðiteymi finna leiðir til tæknilegra úrlausna og hagaðilar koma að umræðu, greiningu og stefnumörkun. Markmiðið er að flýta fyrir vísindalegri þekkingu með því að byggja upp net rannsóknarstöðva á nokkrum stöðum í heiminum sem hafa tilskilin leyfi, búnað og aðföng til rannsóknarstarfa á þessu sviði