Akureyri

Akureyrarbær er stór vinnustaður með rúmlega 2.000 starfsmenn. Á hverju vori fjölgar starfsfólki um nálægt 1.200 manns vegna sumarafleysinga og vinnuskólans. Starfsfólk Akureyrarbæjar sinnir margvíslegum verkefnum sem tryggja velferð og ánægju íbúa Akureyrar, hvort sem um er að ræða störf við leik- eða grunnskóla, íbúakjarna, rekstur mannvirkja, stjórnsýslu eða annað.

Vinnustaðurinn

Velferðarsvið: Forstöðumaður í félagsþjónustu

Velferðarsvið leitar að forstöðumanni í félagsþjónustu. Um er að ræða ótímabundna 100% stöðu forstöðumanns. Unnið er í dagvinnu.

Á velferðarsviði Akureyrarbæjar er rekin fjölbreytt velferðarþjónusta samkvæmt lögum um félagsþjónustu sveitarfélaga, barnaverndarlögum, lögum um þjónustu við fatlað fólk með langvarandi stuðningsþarfir, lögum um samþættingu þjónustu í þágu farsældar barna og lögum um málefni aldraðra.

Markmið sviðsins er að veita einstaklingsbundna, sveigjanlega og framsækna velferðarþjónustu.

Forstöðumaður félagsþjónustu veitir forstöðu almennri og sértækri félagsþjónustu, s.s. ráðgjöf, húsnæðismál, móttöku flóttamanna, málstjórn í þágu farsældar barna, og ýmis úrræði s.s. fjárhagsaðstoð og Öskjunni í samstarfi við annað starfsfólk sviðsins, og eflir faglegt starf á sviðinu. Næsti yfirmaður er sviðsstjóri.

Helstu verkefni og ábyrgð

Hefur yfirumsjón með þeirri þjónustu sem félagsþjónustan veitir.
Hefur eftirlit með því að öll framkvæmd sé í samræmi við samþykktar verklagsreglur, ákvæði laga, reglna og samþykktum Akureyrarbæjar.
Hefur frumkvæði og forystu um forvarnarverkefni gagnvart sérstökum áhættuhópum í samvinnu við aðra aðila eftir því sem við á.
Hefur forystu um þróunarverkefni, fræðslu og faglega umræðu.
Kemur að fjárhags- og starfsáætlanagerð velferðarsviðs og eftirfylgni hvað varðar félagsþjónustuna.
Sinnir mannauðsstjórnun í samræmi við mannauðsstefnu, starfsmannaferli, verkferla og leiðbeiningar þar að lútandi.
Stuðlar að faglegum vinnubrögðum með því að leiðbeina og handleiða starfsmenn félagsþjónustunnar og styðja þá í starfi.
Ber ábyrgð á söfnun tölulegra upplýsinga um félagsþjónustuna.
Hefur frumkvæði að því að kynna nýjungar í þjónustu í málaflokkum félagsþjónustunnar.
Vinnur að samþættingu þjónustu innan stofnunar og utan með því að vinna mál þvert á málaflokka á velferðarsviði og taka þátt í ýmsum vinnuhópum þvert á kerfi Akureyrarbæjar.

Menntunar- og hæfniskröfur

Háskólapróf á sviði félags- eða heilbrigðisvísinda og viðeigandi starfsleyfi. (BA/BS).
Framhaldsmenntun á sviði félags- eða heilbrigðisvísinda er æskileg.
Starfið krefst 3 - 5 ára reynslu af starfi í almennri og sérhæfðri félagsþjónustu.
Þekking á lögum og reglugerðum um málaflokkinn, s.s. félagsþjónustu, farsældarlög, málaflokk fatlaðs fólks, barnavernd, sérfræðiþjónusta leik- og grunnskóla.
Reynsla af skipulagningu, framkvæmd og eftirfylgni velferðarmála.
Reynsla af teymisstjórnun kostur.
Áhugi og skilningur á þróun velferðarþjónustu og þjónustubreytingum.
Samskiptafærni, sjálfstæð vinnubrögð og frumkvæði.
Færni í ritun texta og framsetningu upplýsinga.
Góð almenn tölvufærni.
Drifkraftur og lausnamiðuð nálgun.
Góð íslenskukunnátta bæði í ræðu og riti ásamt enskukunnáttu.
Gerð er krafa um vammleysi, s.s. að vera með gott orðspor og að framkoma og athafnir á vinnustað og utan hans samrýmist starfinu.

Umsókninni skal fylgja ítarlegt yfirlit yfir starfsferil og greinargóðar upplýsingar um störf umsækjanda, menntun og þau verkefni sem hann hefur unnið að og varpað geta ljósi á færni hans til að sinna starfi forstöðumanns.

Tekið verður tillit til Mannréttindastefnu Akureyrarbæjar um jafnréttismál við ráðningu í starfið.

Laun eru samkvæmt kjarasamningi Sambands íslenskra sveitarfélaga og viðeigandi stéttarfélags.

Upplýsingar um kaup og kjör veitir launadeild Akureyrarbæjar: launadeild@akureyri.is

Nánari upplýsingar um starfið veitir Karólína Gunnarsdóttir sviðsstjóri velferðarsviðs Akureyrarbæjar í netfangi: karolina@akureyri.is

Einungis er tekið á móti rafrænum umsóknum

Umsóknarfrestur er til og með 13. október 2024.

Auglýsing birt27. september 2024

Umsóknarfrestur13. október 2024

Tungumálahæfni