Teymisstjóri - sálfræðingur/hjúkrunarfræðingur í heilbrigðisþjónustu við börn sem hafa orðið fyrir ofbeldi og áföllum

Kvenna- og barnaþjónusta Landspítala óskar eftir hjúkrunarfræðingi eða sálfræðingi í starf teymisstjóra nýrrar ofbeldismóttöku barna sem falið er að skipuleggja og veita heilbrigðisþjónustu við börn sem þarfnast sérhæfðrar, samfelldrar og áfallamiðaðrar þjónustu. Viðkomandi þarf að búa yfir mikilli leiðtogafærni og getu til að styðja við samstarfsfólk í krefjandi störfum. Teymið mun sinna börnum sem hafa orðið fyrir ofbeldi, vanrækslu eða öðrum alvarlegum áföllum.

Teymisstjóri verður leiðandi í mótun samvinnu og framtíðarsýnar með hagaðilum og stjórnendum á Barna- og unglingageðdeild og Barnaspítala Hringsins og mun gegna lykilhlutverki í uppbyggingu tengslanets við aðila sem koma að málefnum barna. Starfið felur í sér einstakt tækifæri til að hafa áhrif á mótun og uppbyggingu nýrrar þjónustu og hentar sérfræðingi sem vill vinna í nánu samstarfi við fjölbreyttan hóp hagaðila og hafa raunveruleg áhrif á velferð barna til framtíðar.

Fagaðilum sem ráða sig til þjónustu í nýju teymi býðst markviss þjálfun og fræðsla, hérlendis sem erlendis. Aðal starfsstöð teymisstjóra verður á Barnaspítala Hringsins og unnið verður í nánu samstarfi við þverfaglegt teymi fagfólks. Starfshlutfall er 80-100% og æskilegt er að umsækjandi geti hafið störf sem fyrst, en upphafsdagur er samkomulagsatriði. Um tímabundna ráðningu til eins árs er að ræða.