Í Kársnesskóla eru tæplega 700 nemendur í 33 bekkjardeildum. Starfsmenn eru um 120 og þar af eru kennarar tæplega 60 talsins. Starfssemi er á þremur stöðum. Í Vallargerði er aðalbygging skólans staðsett ásamt lausum kennslustofum á lóð skólans. Í Holtagerði er íþróttahús Kársnesskóla og við Borgarholtsbraut er Sundlaug Kópavogs þar sem skólasund fer fram. Gildi Kársnesskóla eru þekking, virðing, ábyrgð og ánægja en starfsfólk skólans hefur það að meginmarkmiði að útskrifa ánægða og vel menntaða nemendur með sterka sjálfsmynd sem eru tilbúnir að takast á við lífið. Uppeldi til ábyrgðar er uppeldis- og samskiptastefna sem stuðst er við í Kársnesskóla. Hún miðar að því að efla innri hvata barnanna til að verða góðir og gefandi einstaklingar sem lifa í sátt við annað fólk og umhverfi sitt. Þar er viðurkennt að öllum getur orðið á mistök og tækifæri gefið til að leiðrétta þau eftir bestu getu. Þessi uppeldisstefna er ekki einungis leiðarvísir að gefandi samskiptum barnanna heldur starfsmannanna líka og setur sinn brag á allt skólastarf.