Starf forstöðumanns Gunnarsstofnunar á Skriðuklaustri
Stofnun Gunnars Gunnarssonar á Skriðuklaustri auglýsir laust til umsóknar starf forstöðumanns. Um er að ræða 100% starf frá og með 1. janúar 2026. Starfið krefst búsetu á Fljótsdalshéraði en húsnæði fylgir ekki.
Í boði er fjölbreytt og krefjandi starf hjá menningarstofnun þar sem reynir á lausnamiðað viðhorf, frumkvæði, sköpun og metnað til að ná árangri. Forstöðumaður Gunnarsstofnunar hefur umsjón með starfsemi og daglegum rekstri. Hann starfar með stjórn og starfsfólki að því að ná settum markmiðum en leiðarljós Gunnarsstofnunar er að vera leiðandi í menningarmiðlun.
- Fjármál, rekstur og styrkumsóknir
- Stefnumótun og útfærsla á starfsemi
- Öll miðlun, viðburðir og sýningar stofnunarinnar
- Höfundarréttur Gunnars Gunnarssonar
- Samningar og samstarf við innlenda og erlenda aðila
- Starfsmannamál og umsjón fasteigna
- Háskólamenntun á sviði hug- eða félagsvísinda og skyldra greina
- Góð þekking á menningarmiðlun og hagnýt reynsla á því sviði
- Leiðtogahæfileikar og lipurð í mannlegum samskiptum
- Reynsla af stjórnun, rekstri og fjárhagslegri ábyrgð
- Reynsla af bæði fræðilegum og almennum textaskrifum
- Frumkvæði og sjálfstæði í vinnubrögðum
- Gott vald á íslensku og ensku bæði í ræðu og riti
- Kunnátta í Norðurlandamáli er æskileg
- Reynsla af alþjóðlegu og þverfaglegu samstarfi er æskileg
- Reynsla af sókn í innlenda sem erlenda sjóði er kostur
Gunnarsstofnun rekur menningar- og fræðasetur á Skriðuklaustri í Fljótsdal helgað arfleifð Gunnars Gunnarssonar skálds og miðaldaklaustrinu sem stóð þar á 16. öld.
Gunnarsstofnun var sett á stofn árið 1997 og hóf starfsemi á Skriðuklaustri formlega sumarið 2000. Frá ársbyrjun 2008 hefur stofnunin verið rekin sem sjálfseignarstofnun með sérstaka stjórn og starfar á grundvelli laga nr. 19/1988 um sjóði og stofnanir sem starfa samkvæmt staðfestri skipulagsskrá. Stofnunin er með samning um rekstrarstyrk við menningar-, nýsköpunar- og háskólaráðuneytið.
Hlutverk stofnunarinnar er fjölþætt:
- Að annast uppbyggingu og rekstur menningar- og fræðaseturs að Skriðuklaustri í Fljótsdal.
- Að stunda fræðastarfsemi á sviði hugvísinda og leggja rækt við bókmenntir með áherslu á ritverk og ævi Gunnars Gunnarssonar.
- Að reka dvalarstað fyrir lista- og fræðimenn og standa fyrir sýningum og öðrum listviðburðum.
- Að stuðla að atvinnuþróun á Austurlandi og efla rannsóknir á austfirskum fræðum.
- Að sinna alþjóðlegum menningartengslum og standa vörð um hugsjónir Gunnars Gunnarssonar.
Gildi Gunnarsstofnunar: Við viljum vera opin, fagleg og skapandi og í starfi leggjum við áherslu á metnað, framsýni, samvinnu og upplifun.
Enska
Íslenska
Danska
