Skrifstofustjóri í Stykkishólmi
Virkjaðu krafta þína með okkur!
Við leitum að mannblendinni og talnaglöggri manneskju sem nýtur þess að vinna með fólki og efla góða vinnustaðarmenningu. Hér sameinast verkefni á sviði mannauðsmála og fjármála þar sem góður starfsandi og starfsaðstaða er forgangsverkefni. Fylgdu straumnum til okkar og virkjaðu þína krafta til framtíðar.
Skrifstofustjóri RARIK í Stykkishólmi gegnir fjölbreyttu hlutverki á Vesturlandi og er nokkurs konar fulltrúi fyrirtækisins í fjórðungnum, t.d. gagnvart samfélögum á svæðinu. Við leitum að manneskju með metnað og reynslu þegar kemur að fræðslumálum á vinnustöðum en getur jafnframt sett á sig bókhaldsgleraugun og sinnt ýmsum verkefnum á fjármálasviði.
Skrifstofustjórar RARIK vinna fjölbreytt verkefni sem snúa að fræðslu og aðbúnaði starfsfólks og mannauðsmálum almennt. Þeir taka einnig þátt í skipulagningu viðburða og kynninga og móttöku gesta og skólahópa. Auk þess hafa skrifstofustjórar RARIK umsjón með ýmis konar uppgjörum og kostnaðarlegri ábyrgð og eftirliti og styðja við fjármálasvið á sínum svæðum. Hér er starf fyrir þau sem vilja vera inni í öllu og njóta þess að vinna með fólki.
Við viljum fá kraftmikla og sjálfstæða manneskju sem hefur hugmyndaflug og frumkvæði til að leiða verkefni áfram. Umsækjendur ættu að hafa brennandi áhuga á því að móta jákvæða vinnustaðarmenningu og efla hag og velferð bæði starfsfólks og fyrirtækisins. Mikilvægt er að umsækjendur hafi menntun sem nýtist í starfi, reynslu af mannauðsmálum og fræðslu á vinnustöðum og gott auga fyrir tölum.