Sérhæfður starfsmaður í ræstingum

Við óskum eftir að ráða jákvæðan og þjónustulipran starfskraft með ríka samskipta- og samstarfshæfni til starfa á skurðstofur Landspítala við Hringbraut. Starfið er fjölbreytt og felst m.a. ræstingum á skurðstofum og skurðstofugangi, þrifum á svæfingarvélum og búnaði, áfyllingum og öðrum tilfallandi verkefnum. Unnið er í teymi og krefst því starfið teymisvinnu, sveigjanleika og skipulagðra vinnubragða. Gerð er krafa um góða íslenskukunnáttu og er lágmarksaldur umsækjanda 18 ár. Starfið felur í sér vaktavinnu, unnið er á morgunvöktum (8-17 og 12-20), kvöldvöktum (15-23) og næturvöktum (20-8). Einnig er unnið á helgarvöktum, tvískiptar 12 tíma vaktir, ásamt bakvöktum. Ráðið er í starfið sem fyrst, eða eftir nánari samkomulagi. Starfshlutfall er 100%.

Á skurðstofum Landspítala við Hringbraut eru 11 skurðstofur sem þjóna 7 sérgreinum og árlega eru framkvæmdar þar um 10 þúsund aðgerðir. Þar starfa um 90 einstaklingar; hjúkrunarfræðingar, sjúkraliðar, sótthreinsitæknar, skrifstofufólk og sérhæft starfsfólk við fjölbreytt og krefjandi verkefni, sem unnin eru í nánu samstarfi við fagfólk í öðrum sérgreinum. Gagnreynd þekking, viðurkenndir verkferlar, öryggi sjúklinga og teymisvinna eru höfð í fyrirrúmi og er starf sérhæfðs starfsmanns mikilvægur hlekkur í góðri þjónustu við sjúklinga. Starfsemi fer fram á skurðstofum 12cd, skurðstofum 23a og á útstöðvum.