Sæplast er alþjóðlegt fyrirtæki þar sem skapandi hugsun og áhersla á öryggi, gæði, framleiðni og umhverfismál skila afburðar vörum til viðskiptavina okkar. Sæplast er í fararbroddi í heiminum í hönnun, þróun, framleiðslu og sölu á hverfisteyptum endurnýtanlegum og endurvinnanlegum kerum fyrir sjávarútveg, kjötiðnað og fleiri markaði. Þá er Sæplast leiðandi í þróun, framleiðslu og sölu á hverfisteyptum fráveitulausnum á landsvísu. Sæplast er hluti af Rotovia samstæðunni. Rotovia er alþjóðlegt framleiðslufyrirtæki sem á rætur sínar að rekja til Íslands og er í dag í eigu íslenskra fjárfesta. Félagið er eitt stærsta hverfisteypufyrirtæki í Evrópu, með tíu framleiðslueiningar í sjö löndum auk viðamikils sölunets á heimsvísu. Það þjónar fjölbreyttum hópi viðskiptavina í mismunandi atvinnugreinum, með sérstaka áherslu á matvælaiðnaðinn. Hjá Sæplasti á Dalvík starfa um 60 manns. Í framleiðslunni er unnið á þrískiptum 10 manna vöktum, frá sunnudegi (kl.16:00) fram til kl 16:00 á föstudögum. Framleiðsluferlið byggir á hverfissteypu þar sem plasthráefni er sett í lokað mót og því snúið um tvo ása inni í ofni. Þegar mótið hitnar bráðnar hráefnið og sest á innra yfirborð þess og eftir að allt plastið hefur bráðnað er mótið tekið úr ofninum og kælt. Sæplast leggur upp úr góðu og sveigjanlegu starfsumhverfi fyrir starfsfólk sitt ásamt reglulegri þjálfun, sí- og endurmenntun. Innan Sæplasts starfar öflugt starfsmannafélag sem stendur reglulega fyrir skemmtilegum viðburðum. Sæplast er traustur og skemmtilegur vinnustaður með góðan starfsanda. Sæplast býður upp á samkeppnishæf laun og starfsöryggi þar sem fagleg vinnubrögð, öryggi og heilsa starfsmanna er í fyrirrúmi.